മൂന്നാം അലോട്ട്മെന്റിലും മലപ്പുറത്ത് സീറ്റ് പ്രതിസന്ധി; 25,000-ത്തിലധികം വിദ്യാർത്ഥികൾ പ്ലസ് വണ്ണിന് പുറത്ത്

ഷീബ വിജയൻ

പ്ലസ് വൺ പ്രവേശനത്തിനുള്ള മൂന്ന് പ്രധാന അലോട്ട്മെന്റുകൾ പൂർത്തിയായിട്ടും മലപ്പുറം ജില്ലയിൽ 25,084 വിദ്യാർത്ഥികൾക്ക് സീറ്റ് ലഭിക്കാതെ പുറത്തുനിൽക്കേണ്ടി വരുന്ന കടുത്ത പ്രതിസന്ധിയാണ് നിലവിലുള്ളത്. ജില്ലയിൽ ഇനി സംവരണ വിഭാഗത്തിലെ വെറും 71 സീറ്റുകൾ മാത്രമാണ് അവശേഷിക്കുന്നത്. മൂന്നാം അലോട്ട്മെന്റിൽ 18,987 വിദ്യാർത്ഥികൾക്ക് മാത്രമാണ് സീറ്റ് ലഭിച്ചത്. മലപ്പുറം, കോഴിക്കോട്, കാസർകോട്, പാലക്കാട് തുടങ്ങിയ ജില്ലകളിലെ രൂക്ഷമായ ഈ സീറ്റ് ക്ഷാമം പരിഹരിക്കാൻ താൽക്കാലികമായി 120 പുതിയ ബാച്ചുകൾ അനുവദിക്കാനാണ് സർക്കാരിന്റെ നീക്കം. ഈ താൽക്കാലിക ബാച്ചുകളിലൂടെ മലബാറിലാകെ ആകെ 6,000 കുട്ടികൾക്ക് മാത്രമാണ് പുതുതായി സീറ്റ് ലഭിക്കുക. എന്നാൽ വർഷങ്ങളായുള്ള ഈ പ്രതിസന്ധിക്ക് സ്ഥിരം ബാച്ചുകൾ അനുവദിക്കുക മാത്രമാണ് പോംവഴിയെന്നും, താൽക്കാലിക സംവിധാനങ്ങൾ ശാശ്വത പരിഹാരമല്ലെന്നുമുള്ള ആശങ്ക പ്രദേശത്ത് ശക്തമായി നിലനിൽക്കുന്നു.

മലബാറിൽ ഇത്തവണയും പ്ലസ് വൺ സീറ്റ് പ്രതിസന്ധി അതീവ രൂക്ഷമായി തുടരുകയാണ്. കഴിഞ്ഞ കുറച്ചു വർഷങ്ങളായി മലബാറിലെ ആറ് ജില്ലകളിലും പ്ലസ് വൺ സീറ്റുകളുടെ എണ്ണത്തിൽ ഗണ്യമായ കുറവുണ്ട്. ഇതിൽ മലപ്പുറത്താണ് സ്ഥിതി ഏറ്റവും വഷളായിരിക്കുന്നത് എങ്കിലും മറ്റ് മലബാർ ജില്ലകളിലെയും അവസ്ഥ ഇതിൽ നിന്നും വ്യത്യസ്തമല്ല. നിലവിലെ കണക്കുകൾ പ്രകാരം ആറ് ജില്ലകളിലായി ആകെ 53,164 സീറ്റുകളുടെ കുറവാണ് രേഖപ്പെടുത്തിയിരിക്കുന്നത്. അതുകൊണ്ടുതന്നെ പുതിയ സർക്കാർ വിദ്യാഭ്യാസ മേഖലയിൽ നേരിടുന്ന ഏറ്റവും ആദ്യത്തെയും വലിയതുമായ വെല്ലുവിളിയാവും മലബാറിലെ ഈ പ്ലസ് വൺ സീറ്റ് പ്രതിസന്ധി. പലപ്പോഴും താൽക്കാലിക സംവിധാനങ്ങൾ ഏർപ്പെടുത്തിയാണ് മുൻപും ഈ പ്രതിസന്ധി നേരിട്ടിട്ടുള്ളത്. എന്നിട്ടും കഴിഞ്ഞ തവണ സീറ്റ് കിട്ടാത്തതുമൂലം നിരവധി വിദ്യാർത്ഥികൾക്ക് ഓപ്പൺ സ്കൂൾ, അൺഎയ്ഡഡ് തുടങ്ങിയ മറ്റ് സംവിധാനങ്ങളെ ആശ്രയിക്കേണ്ടി വന്നിരുന്നു.

നിലവിലെ സീറ്റ് ക്ഷാമം അല്പമെങ്കിലും കുറയ്ക്കുന്നതിനായി മുൻപുണ്ടായിരുന്ന 352 താൽക്കാലിക ബാച്ചുകൾ ഇത്തവണയും നിലനിർത്താൻ ധാരണയായിട്ടുണ്ട്. ഇതിനുള്ള ഔദ്യോഗിക ഉത്തരവ് ഉടൻ പുറത്തിറക്കാനുള്ള നീക്കത്തിലാണ് സർക്കാർ. ഈ 352 താൽക്കാലിക ബാച്ചുകളിൽ 314 ബാച്ചുകളും മലബാറിന് തന്നെ അനുവദിച്ചതാണ്. സീറ്റ് കുറവായതിനാൽ സാധാരണ ഗതിയിൽ 45 കുട്ടികൾ ഇരിക്കേണ്ട ക്ലാസുകളിൽ നിലവിൽ 60 കുട്ടികളെ വരെ ഇരുത്തിയാണ് പഠിപ്പിക്കുന്നത്. ഇത് ക്ലാസുകളിലെ പഠന നിലവാരത്തെയും കുട്ടികളുടെ ശ്രദ്ധയെയും പ്രതികൂലമായി ബാധിക്കുമെന്ന ആശങ്കയുമുണ്ട്. എന്നാൽ തെക്കൻ കേരളത്തിൽ സ്ഥിതി തികച്ചും വിപരീതമാണ്. കോട്ടയം, പത്തനംതിട്ട തുടങ്ങിയ തെക്കൻ ജില്ലകളിൽ കഴിഞ്ഞ തവണ മാത്രം ഏഴായിരത്തോളം പ്ലസ് വൺ സീറ്റുകളാണ് ഒഴിവുകിടന്നത്.