തുർക്കിയിൽ മഞ്ഞിടിച്ചിലിൽ 39 പേർ മരിച്ചു
അങ്കാറ: കിഴക്കൻ തുർക്കിയിൽ കഴിഞ്ഞ ദിവസങ്ങളിലുണ്ടായ മഞ്ഞിടിച്ചിലിൽ 39 പേർ മരിച്ചു. നിരവധി പേർക്ക് പരിക്കേറ്റു. മേഖലയിൽ രക്ഷാപ്രവർത്തകർ തിരച്ചിൽ നടത്തിവരികയാണ്. ഇറാൻ അതിർത്തിക്കുസമീപം ചൊവ്വാഴ്ചയുണ്ടായ ഹിമപാതത്തിൽ അഞ്ചുപേർ മരിക്കുകയും ഏതാനും പേർക്ക് പരിക്കേൽക്കുകയും ചെയ്തിരുന്നു. ഇവി‌ടെ രക്ഷാപ്രവർത്തനം പുരോഗമിക്കുന്നതിനിടെ ബുധനാഴ്ച വീണ്ടും മഞ്ഞിടിച്ചിൽ ഉണ്ടായി. ഇതാണ് മരണസംഖ്യ കൂടാനിടയായത്.
ബുധനാഴ്ചയുണ്ടായ മഞ്ഞിടിച്ചിലിൽ രക്ഷാപ്രവർത്തകരുടെ സംഘമുൾപ്പെടെ 34 പേർ മരിച്ചു. രക്ഷാപ്രവർത്തകസംഘത്തിലെ 26 പേരാണ് മരിച്ചതെന്ന് അധികൃതർ പറഞ്ഞു. മുന്നൂറോളം രക്ഷാപ്രവർത്തകർ അപകടസ്ഥലത്തുണ്ട്.
