ഒരാഴ്ച്ചയ്ക്കിടെ പൊട്ടിത്തെറിച്ചത് രണ്ട് ഷവോമി ഫോണുകൾ
ഹോങ്കോങ്ങ്: ചൈനയിൽ ഷവോമിയുടെ എംഐ 5 സ്‌മാർട്ട്‌ഫോൺ പൊട്ടിത്തെറിച്ചതായി റിപ്പോർട്ട്. ഒരാഴ്‌ച്ചക്കിടെ ഇത് രണ്ടാം തവണയാണ് ഷവോമി ഫോണുകൾ പൊട്ടിത്തെറിക്കുന്നുവെന്ന പരാതി ഉയരുന്നത്.
ചൈനയിൽ നിന്നുള്ള ഉപയോക്താവ് പൊട്ടിത്തെറിച്ച ഫോണിന്റെ ചിത്രവും ഓൺലൈനിൽ പോസ്‌റ്റ് ചെയ്‌തിട്ടുണ്ട്. എന്നാൽ ഇതുസംബന്ധിച്ച് കമ്പനിയുടെ ഔദ്യോഗിക സ്ഥിരീകരണമുണ്ടായിട്ടില്ല.
ദിവസങ്ങൾക്ക് മുമ്പ് നോയിഡയിൽ നിന്നുള്ള ഒരു ഉപയോക്താവും സ്‌മാർട്ട്‌ഫോണിന്റെ ബാറ്ററി പൊട്ടിത്തെറിച്ചെന്നുള്ള പരാതിയുമായി വന്നിരുന്നു. തുടർന്ന് കമ്പനി ഇയാളുടെ ഫോൺ മാറ്റി നൽകി. ഫോൺ പൊട്ടിത്തെറിച്ചതിന്റെ കാരണം അന്വേഷിച്ച് വരികയാണെന്ന് കമ്പനി അധികൃതർ വ്യക്തമാക്കിയിരുന്നു.
നോയിഡ സ്വദേശിയുടെ എംഐ 4 ഐ ഫോണാണ് ഓഫീസിലിരുന്ന് ഉപയോഗിച്ചുകൊണ്ടിരിക്കെ പൊട്ടിത്തെറിച്ചത്. ഭാഗ്യവശാൽ ഇയാൾക്ക് അപകടമൊന്നും സംഭവിച്ചില്ല. തുടർന്ന് ഫോൺ പൊട്ടിത്തെറിക്കുന്ന സിസിടിവി ദൃശ്യങ്ങൾ സഹിതം ഇയാൾ കമ്പനിയെ സമീപിക്കുകയായിരുന്നു.
