ബഹ്റൈനിൽ മയക്കുമരുന്ന് വേട്ട: രണ്ട് ഏഷ്യൻ സ്വദേശികൾ പിടിയിൽ
പ്രദീപ് പുറവങ്കര I ബഹ്റൈൻ
മനാമ: രാജ്യത്തെ മയക്കുമരുന്ന് വിപണനത്തിനെതിരെയുള്ള പോരാട്ടം ശക്തമാക്കി ബഹ്റൈൻ ആഭ്യന്തര മന്ത്രാലയം. ജനറൽ ഡയറക്ടറേറ്റ് ഓഫ് ക്രിമിനൽ ഇൻവെസ്റ്റിഗേഷൻ ആൻഡ് എവിഡൻസിന് കീഴിലുള്ള ഡ്രഗ് എൻഫോഴ്സ്മെന്റ് അഡ്മിനിസ്ട്രേഷൻ നടത്തിയ രണ്ട് വ്യത്യസ്ത നീക്കങ്ങളിലായി രണ്ട് ഏഷ്യൻ സ്വദേശികളെ അറസ്റ്റ് ചെയ്തു. പിടിയിലായവർക്ക് 21-ഉം 36-ഉം വയസ്സാണ് പ്രായം.
ഇവരിൽ നിന്ന് അഞ്ച് കിലോഗ്രാമിലധികം മയക്കുമരുന്നും മാനസികനിലയെ ബാധിക്കുന്ന തരത്തിലുള്ള സൈക്കോട്രോപിക് പദാർത്ഥങ്ങളും കണ്ടെടുത്തു. പിടിച്ചെടുത്ത ലഹരിവസ്തുക്കൾക്ക് വിപണിയിൽ ഏകദേശം 61,000 ബഹ്റൈൻ ദിനാറിലധികം മൂല്യം വരുമെന്ന് അധികൃതർ വ്യക്തമാക്കി. ലഹരിയുടെ വിപത്തിൽ നിന്ന് സമൂഹത്തെ സംരക്ഷിക്കുന്നതിനായി ആഭ്യന്തര മന്ത്രാലയം നടത്തുന്ന വിപുലമായ സുരക്ഷാ പ്രവർത്തനങ്ങളുടെ ഭാഗമായാണ് ഈ നടപടി.
ലഭ്യമായ രഹസ്യ വിവരങ്ങളുടെ അടിസ്ഥാനത്തിൽ നടത്തിയ കൃത്യമായ അന്വേഷണത്തിനൊടുവിലാണ് പ്രതികളെ തിരിച്ചറിയുന്നതും ലഹരിവസ്തുക്കളുമായി ഇവരെ പിടികൂടുന്നതും. പിടിച്ചെടുത്ത തൊണ്ടിമുതലുകൾ കസ്റ്റഡിയിലെടുത്ത് സുരക്ഷിതമാക്കിയിട്ടുണ്ട്. പ്രതികൾക്കെതിരെ ആവശ്യമായ നിയമനടപടികൾ ആരംഭിച്ചതായും കേസ് തുടർനടപടികൾക്കായി പബ്ലിക് പ്രോസിക്യൂഷന് കൈമാറിയതായും ജനറൽ ഡയറക്ടറേറ്റ് ഓഫ് ക്രിമിനൽ ഇൻവെസ്റ്റിഗേഷൻ ആൻഡ് എവിഡൻസ് അറിയിച്ചു.
cfgg
