നിയമസഭാ തെരഞ്ഞെടുപ്പിൽ ഡല്‍ഹിയില്‍ കോണ്‍ഗ്രസിന് തിരിച്ചടി ഉണ്ടാകുമെന്ന് പി.സി. ചാക്കോ
ന്യൂഡല്‍ഹി: ഡല്‍ഹി നിയമസഭാ തെരഞ്ഞെടുപ്പില്‍ കോണ്‍ഗ്രസ് പാര്‍ട്ടിയുടെ സംഘടനാ സംവിധാനം നിര്‍ജീവമായിരുന്നെന്ന് സംസ്ഥാനത്തിന്‍റെ ചുമതല വഹിക്കുന്ന കോണ്‍ഗ്രസ് നേതാവ് പി.സി. ചാക്കോ. തെരഞ്ഞെടുപ്പ് ഫലത്തില്‍ കോണ്‍ഗ്രസിന് തിരിച്ചടി ഉണ്ടാകുമെന്നും ചാക്കോ പറഞ്ഞു. സംഘടനാ സംവിധാനം സജ്ജമായിരുന്നില്ല. തെരഞ്ഞെടുപ്പ് സമിതി ചെയര്‍മാന്‍ കീര്‍ത്തി ആസാദ് പരാജയമായിരുന്നെന്നും ചാക്കോ വിമര്‍ശിച്ചു. ഡല്‍ഹിയുടെ ചുമതല ഒഴിയാനുള്ള സന്നദ്ധത ഹൈക്കമാന്‍ഡിനെ അറിയിക്കുമെന്നും കേരളത്തിലേക്ക് മടങ്ങാനാണ് ആഗ്രഹമെന്നും ചാക്കോ പറഞ്ഞു. ഡൽഹിയിൽ കോൺഗ്രസിന് കനത്ത തിരിച്ചടിയുണ്ടാകുമെന്ന് എക്സിറ്റ് പോൾ ഫലങ്ങൾ പുറത്തുവന്നതിനു പിന്നാലെ‍യാണ് പ്രതികരണവുമായി ചാക്കോ രംഗത്തെത്തിയത്. ഭൂരിപക്ഷം പ്രവചന ഫലങ്ങളും ആം ആദ്മിക്കും കേജരിവാളിനും അനുകൂലമായാണ് വിധിയെഴുതിയത്.
