പശ്ചിമേഷ്യൻ യുദ്ധം: ഇന്ത്യയിൽ ഇന്ധന പ്രതിസന്ധിയുണ്ടാകില്ലെന്ന് പ്രധാനമന്ത്രി; നാളെ സർവകക്ഷിയോഗം

ശാരിക I ദേശീയം
ന്യൂഡൽഹി: ഇറാൻ-ഇസ്രയേൽ സംഘർഷം പശ്ചിമേഷ്യയിൽ രൂക്ഷമാകുന്ന സാഹചര്യത്തിലും ഇന്ത്യയിൽ ഇന്ധന പ്രതിസന്ധിയുണ്ടാകില്ലെന്ന് പ്രധാനമന്ത്രി നരേന്ദ്ര മോദി ഉറപ്പുനൽകി. രാജ്യത്ത് ആവശ്യത്തിന് ക്രൂഡ് ഓയിൽ ശേഖരമുണ്ടെന്നും നിലവിലെ ആഗോള സാഹചര്യം മുൻനിർത്തി ഊർജ്ജ മേഖലയിൽ സ്വയംപര്യാപ്തത കൈവരിക്കുക എന്നത് അനിവാര്യമാണെന്നും അദ്ദേഹം പറഞ്ഞു. ഹോർമുസ് കടലിടുക്കിലെ സംഘർഷം ആഗോള എണ്ണ വിതരണത്തെ ബാധിച്ചിട്ടുണ്ടെങ്കിലും ഇന്ത്യ മുൻകൂട്ടി വലിയ തോതിൽ ഇന്ധനം ശേഖരിച്ചിട്ടുള്ളതിനാൽ ഉടനടി ഒരു പ്രതിസന്ധി ഉണ്ടാകില്ലെന്നും പ്രധാനമന്ത്രി വ്യക്തമാക്കി.

അതേസമയം, പശ്ചിമേഷ്യയിലെ യുദ്ധസാഹചര്യം ചർച്ച ചെയ്യുന്നതിനായി കേന്ദ്ര സർക്കാർ നാളെ ഉച്ചയ്ക്ക് പാർലമെന്റ് ഹൗസിൽ സർവകക്ഷിയോഗം വിളിച്ചു. മേഖലയിലെ നിലവിലെ സ്ഥിതിഗതികളെക്കുറിച്ചും ഇന്ത്യ സ്വീകരിക്കേണ്ട നയതന്ത്ര നിലപാടുകളെക്കുറിച്ചും രാഷ്ട്രീയ പാർട്ടികളെ ബോധ്യപ്പെടുത്തുകയാണ് യോഗത്തിന്റെ പ്രധാന ലക്ഷ്യം. വിദേശകാര്യ മന്ത്രി എസ്. ജയശങ്കർ പശ്ചിമേഷ്യയിലെ സൈനിക സാഹചര്യങ്ങളെക്കുറിച്ചും ഇന്ത്യയുടെ നയതന്ത്ര നീക്കങ്ങളെക്കുറിച്ചും വിവിധ പാർട്ടി നേതാക്കൾക്ക് വിശദീകരണം നൽകും. യുദ്ധമേഖലയിൽ കഴിയുന്ന ആയിരക്കണക്കിന് ഇന്ത്യക്കാരുടെ സുരക്ഷയും അവരെ ഒഴിപ്പിക്കാനുള്ള സാധ്യതകളും യോഗത്തിൽ വിശദമായി ചർച്ച ചെയ്യും.

ഹോർമുസ് കടലിടുക്കിലെ തടസ്സങ്ങൾ ഇന്ത്യൻ സമ്പദ്‌വ്യവസ്ഥയിൽ ഉണ്ടാക്കാൻ ഇടയുള്ള ആഘാതങ്ങളും യോഗം വിലയിരുത്തും. പ്രധാനമന്ത്രി നരേന്ദ്ര മോദി നേരിട്ട് പങ്കെടുത്തേക്കുമെന്ന് സൂചനയുള്ള ഈ യോഗത്തിൽ, പുനരുപയോഗ ഊർജ്ജം പ്രോത്സാഹിപ്പിക്കുന്നതിലൂടെ ഇന്ത്യയെ ഊർജ്ജ സ്വതന്ത്രമാക്കാനുള്ള സർക്കാരിന്റെ ദീർഘകാല പദ്ധതികളും ചർച്ചയാകും. വിതരണ ശൃംഖലകൾ തടസ്സപ്പെടാതിരിക്കാൻ അന്താരാഷ്ട്ര തലത്തിൽ നടത്തുന്ന ഇടപെടലുകളെക്കുറിച്ചും സർക്കാർ പ്രതിപക്ഷ നേതാക്കളെ അറിയിക്കും.