റെക്കോർഡ് തീർത്ത് ഭീമൻ സമൂസ
ലണ്ടൻ : ലോകത്തിലെ ഏറ്റവും വലിയ സമൂസയെന്ന റെക്കോർഡ് നേടി ലണ്ടനിലെ മുസ്്ലിം എയ്ഡ് ചാരിറ്റി പ്രവർത്തകർ റെക്കോർഡ് തീർത്തു. 2012ൽ വടക്കൻ ഇംഗ്ലണ്ടിലെ ബ്രാഡ്‌ഫോർഡ് കോളേജ് നിർമ്മിച്ച 110.8 കിലോഗ്രാം സമൂസയുടെ റെക്കോർഡാണ് ഈ ഭീമൻ സമൂസ തകർത്തത്. 153.1 കിലോഗ്രാം ഭാരമുള്ള സമൂസ പന്ത്രണ്ടോളം വരുന്ന മുസ്്ലിം എയ്ഡ് ചാരിറ്റി പ്രവർത്തകർ ചേർന്ന് കിഴക്കൻ ലണ്ടനിലെ ഒരു പള്ളിയിൽ പ്രത്യേകം നിർമ്മിച്ച പാത്രത്തിലാണ് പൊരിച്ചെടുത്തത്. ഏകദേശം 15 മണിക്കൂർ സമയം കൊണ്ടാണ് സമൂസ നിർമ്മാണവും പാകപ്പെടുത്തലും പൂർത്തിയായത്.
സമൂസയ്ക്ക് വേണ്ടി കൂട്ടൊരുക്കുന്പോൾ പ്രശ്നങ്ങളൊന്നും ഉണ്ടായിരുന്നില്ല. എന്നാൽ അത് വേവിച്ചെടുക്കുന്പോൾ പൊട്ടി പോവുമോ എന്നായിരുന്നു തന്റെ പേടിയെന്ന് ഭീമൻ സമൂസയ്ക്ക് പിന്നിൽ പ്രവർത്തിച്ച ഫരീദ് ഇസ്്ലാം പറയുന്നു. എന്നാൽ പൊരിച്ചെടുത്തപ്പോഴും യാതൊരു വിധത്തിലുള്ള പ്രശ്നങ്ങളും സംഭവിച്ചില്ലെന്നും ത്രികോണാകൃതി നഷ്ടപ്പെട്ടില്ലെന്നും ഗിന്നസ് റെക്കോർഡ് വിധികർത്താവ് പ്രവീൺ പട്ടേൽ പറഞ്ഞു. മികച്ച നേട്ടമാണ് ഇതെന്നും അദ്ദേഹ കൂട്ടിച്ചേർത്തു. സമൂസയ്ക്ക് രുചിയും ഗുണവും കുറവില്ലെന്ന് ഫുഡ് ടേസ്റ്റ് പ്രതിനിധി വിധിയെഴുതി. റെക്കോർഡ് രേഖപ്പെടുത്തിയതിന് ശേഷം സമൂസ പ്രദേശവാസികൾക്ക് വിതരണം ചെയ്തു.
