ഔദ്യോഗിക വാഹനവ്യൂഹങ്ങൾക്കായി ഇലക്ട്രോണിക് ഡിസ്പ്ലേ സംവിധാനം: ബഹ്റൈൻ ട്രാഫിക് അതോറിറ്റിയുടെ പുതിയ പദ്ധതി
പ്രദീപ് പുറവങ്കര I ബഹ്റൈൻ
മനാമ: റോഡ് സുരക്ഷ വർധിപ്പിക്കുന്നതിന്റെ ഭാഗമായി ഔദ്യോഗിക വാഹനവ്യൂഹങ്ങളെ (Official Convoys) അനുഗമിക്കുന്ന മോട്ടോർ സൈക്കിളുകളിൽ അത്യാധുനിക ഇലക്ട്രോണിക് ലൈസൻസ് പ്ലേറ്റ് സംവിധാനം ബഹ്റൈൻ ട്രാഫിക് അതോറിറ്റി അവതരിപ്പിച്ചു. ട്രാഫിക് ഡയറക്ടറേറ്റ് ജനറൽ ബ്രിഗേഡിയർ ഷെയ്ഖ് അബ്ദുറഹ്മാൻ ബിൻ അബ്ദുൽ വഹാബ് അൽ ഖലീഫയാണ് പുതിയ സംരംഭത്തിന് തുടക്കം കുറിച്ചത്.
ഔദ്യോഗിക വാഹനവ്യൂഹങ്ങൾ കടന്നുപോകുമ്പോൾ മറ്റ് വാഹന ഡ്രൈവർമാർ സ്വീകരിക്കേണ്ട നടപടികളെക്കുറിച്ച് കൃത്യമായ നിർദ്ദേശം നൽകാനാണ് ഈ സംവിധാനം ലക്ഷ്യമിടുന്നത്. മോട്ടോർ സൈക്കിളുകളിൽ ഘടിപ്പിച്ചിട്ടുള്ള ഇലക്ട്രോണിക് ഡിസ്പ്ലേകളിലൂടെ തത്സമയ നിർദ്ദേശങ്ങൾ നൽകുന്നത് വഴി ഗതാഗതക്കുരുക്ക് ഒഴിവാക്കാനും സുരക്ഷ ഉറപ്പാക്കാനും സാധിക്കും.
റോഡ് സുരക്ഷ എന്നത് എല്ലാവരുടെയും സംയുക്ത ഉത്തരവാദിത്തമാണെന്നും വാഹനയാത്രക്കാർ ഇലക്ട്രോണിക് ഡിസ്പ്ലേയിലെ നിർദ്ദേശങ്ങൾ കൃത്യമായി പാലിക്കണമെന്നും അദ്ദേഹം അഭ്യർത്ഥിച്ചു. ആഭ്യന്തര മന്ത്രാലയത്തിലെയും ബഹ്റൈൻ സർവകലാശാലയിലെയും വിദഗ്ധർ സംയുക്തമായാണ് ഈ പ്രോജക്റ്റ് വികസിപ്പിച്ചത്. സ്ഥാപനങ്ങൾ തമ്മിലുള്ള ഇത്തരം സഹകരണം ജനങ്ങളുടെ ജീവിതനിലവാരം ഉയർത്താൻ സഹായിക്കുമെന്നും അദ്ദേഹം കൂട്ടിച്ചേർത്തു.
sdfsf
