തൊഴിലാളി ദിനത്തിൽ തൊഴിലാളികൾക്ക് സിനിമാ വിരുന്ന് ഒരുക്കി ഐ.സി.ആർ.എഫ്
പ്രദീപ് പുറവങ്കര I ബഹ്റൈൻ
മനാമ: അന്താരാഷ്ട്ര തൊഴിലാളി ദിനത്തോടനുബന്ധിച്ച് ബഹ്റൈനിലെ 250-ഓളം തൊഴിലാളികൾക്ക് സിനിമാ പ്രദർശനം ഒരുക്കി ഇന്ത്യൻ കമ്മ്യൂണിറ്റി റിലീഫ് ഫണ്ട് (ICRF). ലുലു കെയർ, എപിക്സ് സിനിമ, ദാന മോൾ എന്നിവരുമായി സഹകരിച്ചും ബി.ബി.കെ (BBK) ബാങ്കിന്റെ പിന്തുണയോടെയുമാണ് പരിപാടി സംഘടിപ്പിച്ചത്. ഇത് മൂന്നാം വർഷമാണ് ഐ.സി.ആർ.എഫ് ഇത്തരമൊരു സംരംഭം സംഘടിപ്പിക്കുന്നത്.
ആഭ്യന്തര ജോലികളിൽ ഏർപ്പെട്ടിരിക്കുന്ന വനിതാ തൊഴിലാളികളടക്കമുള്ളവർ ചടങ്ങിൽ പങ്കെടുത്തു. ഇതിൽ പലരും ആദ്യമായാണ് ഒരു തീയേറ്ററിൽ സിനിമ കാണാനെത്തുന്നത് എന്നത് ശ്രദ്ധേയമായി. ഐ.സി.ആർ.എഫ് ജനറൽ സെക്രട്ടറി അനീഷ് ശ്രീധരൻ സ്വാഗതം ആശംസിച്ചു. ലേബർ മന്ത്രാലയത്തിലെ സീനിയർ സേഫ്റ്റി എഞ്ചിനീയർ ഹുസൈൻ അൽ ഹുസൈനി, എപിക്സ് സിനിമ സി.ഇ.ഒ സുജയ് ഉച്ചിൽ എന്നിവർ മുഖ്യാതിഥികളായിരുന്നു.
ഐ.സി.ആർ.എഫ് ചെയർമാൻ അഡ്വ. വി.കെ തോമസ് ചടങ്ങിൽ സംസാരിക്കുകയും പിന്തുണ നൽകിയവർക്ക് നന്ദി അറിയിക്കുകയും ചെയ്തു. സിനിമയ്ക്ക് ശേഷം ലഘുഭക്ഷണവും ഭക്ഷണപ്പൊതികളും വിതരണം ചെയ്തതോടെയാണ് ആഘോഷങ്ങൾ സമാപിച്ചത്.
sdfsf
