മൃഗസംരക്ഷണം ഉറപ്പാക്കാൻ ബഹ്റൈനിൽ പ്രത്യേക ഹോട്ട്ലൈൻ; പൊതുജന പങ്കാളിത്തം തേടി മന്ത്രാലയം
പ്രദീപ് പുറവങ്കര I ബഹ്റൈൻ
മനാമ: രാജ്യത്തെ മൃഗസംരക്ഷണ നിയമങ്ങൾ കർശനമായി നടപ്പിലാക്കുന്നതിനും പരാതികളിൽ വേഗത്തിൽ നടപടി സ്വീകരിക്കുന്നതിനുമായി ബഹ്റൈൻ മുനിസിപ്പാലിറ്റി കാര്യ കാർഷിക മന്ത്രാലയം പുതിയ ഹോട്ട്ലൈൻ സംവിധാനം നിലവിൽ വരുത്തി. മൃഗങ്ങളെ ഉപേക്ഷിക്കുന്നതും ഉപദ്രവിക്കുന്നതും തടയുന്നതിനൊപ്പം, ജനവാസ മേഖലകളിലെ തെരുവുമൃഗങ്ങളുടെ വർദ്ധനവ് ഫലപ്രദമായി നിയന്ത്രിക്കാനും ഈ നീക്കം സഹായിക്കും. പൊതുജനങ്ങളിൽ നിന്ന് ലഭിക്കുന്ന വിവരങ്ങൾ കൃത്യസമയത്ത് കൈകാര്യം ചെയ്യുന്നതിലൂടെ മൃഗങ്ങളുടെയും പൊതുജനങ്ങളുടെയും സുരക്ഷ ഉറപ്പാക്കാൻ സാധിക്കുമെന്ന് ഉദ്യോഗസ്ഥർ വ്യക്തമാക്കി.
മൃഗങ്ങൾ നേരിടുന്ന അതിക്രമങ്ങൾ റിപ്പോർട്ട് ചെയ്യുന്നതിനായി 17987227 എന്ന ഹോട്ട്ലൈൻ നമ്പറിൽ ദിവസവും രാവിലെ 7:00 മുതൽ ഉച്ചയ്ക്ക് 2:00 വരെ ബന്ധപ്പെടാവുന്നതാണ്. തെരുവ് നായകളെ കാണുന്ന പക്ഷം അവയുടെ ലൊക്കേഷൻ ഉൾപ്പെടെയുള്ള വിവരങ്ങൾ അറിയിക്കാൻ 38802487 എന്ന മൊബൈൽ/വാട്ട്സ്ആപ്പ് നമ്പറും സജ്ജമാക്കിയിട്ടുണ്ട്. മൃഗങ്ങൾ നേരിടുന്ന ദുരിതങ്ങൾ വർദ്ധിച്ചുവരുന്ന സാഹചര്യത്തിൽ സന്നദ്ധപ്രവർത്തകരും മൃഗസ്നേഹികളും ദീർഘകാലമായി ഉന്നയിക്കുന്ന ആവശ്യങ്ങൾ പരിഗണിച്ചാണ് മന്ത്രാലയത്തിന്റെ ഈ നടപടി.
ഹോട്ട്ലൈൻ സംവിധാനത്തെ സന്നദ്ധപ്രവർത്തകർ സ്വാഗതം ചെയ്യുന്നുണ്ടെങ്കിലും, ഇത് പ്രശ്നത്തിനുള്ള ഒരു ഭാഗിക പരിഹാരം മാത്രമാണെന്ന് ഇവർ അഭിപ്രായപ്പെടുന്നു. സാമ്പത്തിക പ്രതിസന്ധികളും മതിയായ ഷെൽട്ടറുകളുടെ അഭാവവും മൃഗസംരക്ഷണ പ്രവർത്തനങ്ങളെ പ്രതികൂലമായി ബാധിക്കുന്നുണ്ടെന്ന് 'ബഹ്റൈൻ സ്ട്രേയ്സ്' സ്ഥാപക ഫത്തിയ അൽ ബസ്തകി പറഞ്ഞു. ഹോട്ട്ലൈൻ ഒരു നല്ല തുടക്കമാണെങ്കിലും, തെരുവുമൃഗങ്ങൾക്കായി കൂടുതൽ ഷെൽട്ടറുകളും മികച്ച ചികിത്സാ സൗകര്യങ്ങളും ഒരുക്കിയാൽ മാത്രമേ ഈ പ്രശ്നത്തിന് ശാശ്വത പരിഹാരം കാണാൻ സാധിക്കൂ എന്ന് മൃഗസംരക്ഷണ പ്രവർത്തകർ ഓർമ്മിപ്പിക്കുന്നു.
srgdrg
