യു.എ.ഇ.യിൽ വാഹനാപകടത്തില്‍ മലയാളി യുവാവ് മരിച്ചു
റാസല്‍ഖൈമ: യു.എ.ഇ.യിൽ ജബല്‍ ജെയ്‌സിലുണ്ടായ വാഹനാപകടത്തില്‍ മലയാളി യുവാവ് മരിച്ചു. മലപ്പുറം ചെമ്മാട് സ്വദേശി മുഹ്‌സിന്‍ (32) ആണു മരിച്ചത്. ശനിയാഴ്ച രാത്രി നടന്ന അപകടത്തില്‍ നാലുപേര്‍ക്കു പരുക്കേറ്റിട്ടുണ്ട്. ഇതില്‍ ചാലക്കുടി മുരിങ്ങൂര്‍ സ്വദേശി വിപിന്റെ നില ഗുരുതരമാണ്.
ജബല്‍ ജെയ്‌സ് മലയില്‍ നിന്നു വരുന്ന വഴിയിൽ വെച്ച് എതിരെ വന്ന വാഹനവുമായി കൂട്ടിയിടിച്ചാണ് അപകടമുണ്ടായത്.
ഭാര്യയും രണ്ടു കുട്ടികളുമടങ്ങുന്നതാണ് മുഹ്‌സിന്റെ കുടുംബം. നടപടികള്‍ പൂര്‍ത്തിയാക്കി ശേഷം മൃതദേഹം നാട്ടിലേക്കു കൊണ്ടുപോകുമെന്ന് ഇന്ത്യന്‍ അസോസിയേഷന്‍ അറിയിച്ചു.
