മറാഇ 2026: 1.4 ദശലക്ഷം ദിനാറിന്റെ കരാറിനായി കമ്പനികൾ രംഗത്ത്
ഷീബ വിജയൻ
മനാമ: ബഹ്റൈന്റെ പ്രമുഖ കന്നുകാലി വളർത്തൽ-കാർഷിക പ്രദർശനമായ 'മറാഇ 2026' (Mara'ee 2026) സംഘാടനത്തിനായുള്ള 1.4 ദശലക്ഷം ബഹ്റൈനി ദിനാറിന്റെ കൂറ്റൻ കരാറിനായി ടെൻഡർ നടപടികൾ ആരംഭിച്ചു. മുൻസിപ്പാലിറ്റി കാര്യ-കാർഷിക മന്ത്രാലയമാണ് പ്രദർശനത്തിന്റെ പ്ലാനിംഗ്, മാർക്കറ്റിംഗ്, നിർമ്മാണം, നിർവ്വഹണം എന്നിവയുൾപ്പെടെയുള്ള പൂർണ്ണ കരാറിനായി ടെൻഡറുകൾ ക്ഷണിച്ചത്.
രണ്ട് പ്രമുഖ കമ്പനികളാണ് നിലവിൽ ടെൻഡർ സമർപ്പിച്ചിരിക്കുന്നത്. ഫാലിയാത് ഡബ്ല്യു എൽ എൽ 1,231,576.500 ദിനാറിന്റെ കുറഞ്ഞ തുക സമർപ്പിച്ചപ്പോൾ, പിക്കോ ഇന്റർനാഷണൽ ബഹ്റൈൻ 1,429,490 ദിനാറിന്റെ നിരക്ക് സമർപ്പിച്ചതായി ടെൻഡർ ബോർഡ് രേഖകൾ വ്യക്തമാക്കുന്നു.
തുടക്കത്തിലെ ഉദ്ഘാടന ചടങ്ങ്, തത്സമയ മൃഗപ്രദർശനങ്ങൾ, കാർഷിക മേഖലയുടെ ക്രമീകരണം, താത്കാലിക പവലിയനുകളുടെ നിർമ്മാണം, സാങ്കേതിക-ലോജിസ്റ്റിക് പ്രവർത്തനങ്ങൾ എന്നിവ കരാർ ലഭിക്കുന്ന കമ്പനിയാണ് നിർവ്വഹിക്കേണ്ടത്.
ബഹ്റൈനിലെ കർഷകർക്കും കന്നുകാലി വളർത്തലുകാർക്കും അന്താരാഷ്ട്ര തലത്തിൽ ശ്രദ്ധ നേടാൻ സഹായിക്കുന്ന പ്രധാന പ്ലാറ്റ്ഫോമാണ് മറാഇ. അറേബ്യൻ കുതിരകൾ, അപൂർവ്വയിനം മൃഗങ്ങൾ, പ്രദേശിക ഉൽപ്പന്നങ്ങൾ എന്നിവ പ്രദർശിപ്പിക്കുന്നതിനൊപ്പം കാർഷിക യന്ത്രങ്ങൾ, മൃഗസംരക്ഷണം തുടങ്ങിയ മേഖലകളിലെ അന്താരാഷ്ട്ര കമ്പനികളെയും ഈ പ്രദർശനം ആകർഷിക്കുന്നു. ഭക്ഷ്യ സുരക്ഷ ഉറപ്പാക്കാനും സാമ്പത്തിക നിക്ഷേപങ്ങൾ വർദ്ധിപ്പിക്കാനും ലക്ഷ്യമിട്ടാണ് മന്ത്രാലയം പ്രദർശനം സംഘടിപ്പിക്കുന്നത്.
asdsdsdsds
