ലൈസൻസില്ലാത്ത മെഡിക്കൽ പ്രാക്ടീസ്: ശിക്ഷ അഞ്ച് വർഷം തടവും 5,000 ദിനാർ പിഴയുമായി ഉയർത്തി ബഹ്റൈൻ പാർലമെന്റ്
പ്രദീപ് പുറവങ്കര
മനാമ: ആരോഗ്യ മേഖലയിലെ സുരക്ഷയും മേൽനോട്ടവും ശക്തമാക്കുന്നതിന്റെ ഭാഗമായി ലൈസൻസില്ലാതെ മെഡിക്കൽ സേവനങ്ങൾ നൽകുന്നവർക്കുള്ള ശിക്ഷാ നടപടികൾ ബഹ്റൈൻ പാർലമെന്റ് കർശനമാക്കി. പുതിയ നിയമ ഭേദഗതി പ്രകാരം നിയമലംഘകർക്ക് അഞ്ച് വർഷം വരെ തടവും 5,000 ദിനാർ വരെ പിഴയും ലഭിക്കും.
2026-ലെ ഒമ്പതാം നമ്പർ ഡിക്രിയുമായി ബന്ധപ്പെട്ട കരട് നിയമം പാർലമെന്റ് അടിയന്തരമായി പാസാക്കി മേൽസഭയായ ശൂറ കൗൺസിലിന് അയച്ചു. 1987-ലെ രണ്ടാം നമ്പർ ഡിക്രി നിയമത്തിലെ 23-ാം വകുപ്പിലാണ് ഭേദഗതി വരുത്തിയത്. മുൻപ് ഇത്തരം നിയമലംഘനങ്ങൾ നടത്തുന്ന സ്ഥാപനങ്ങൾ അടച്ചുപൂട്ടുന്നതും ഉപകരണങ്ങൾ കണ്ടുകെട്ടുന്നതും നിർബന്ധമായിരുന്നുവെങ്കിൽ, പുതിയ ഭേദഗതി പ്രകാരം ഇത് കോടതികളുടെയോ റെഗുലേറ്ററി അതോറിറ്റിയുടെയോ വിവേചനാധികാരത്തിന് വിട്ടു. എങ്കിലും കോടതി നടപടികൾ പൂർത്തിയാകുന്നത് വരെ സ്ഥാപനങ്ങൾക്ക് ഭരണപരമായ പൂട്ട് ഏർപ്പെടുത്താൻ അധികൃതർക്ക് അധികാരമുണ്ടാകും.
അയോഗ്യരായ വ്യക്തികൾ മെഡിക്കൽ രംഗത്ത് പ്രവർത്തിക്കുന്നത് തടയാനും പൊതുജനാരോഗ്യം സംരക്ഷിക്കാനുമാണ് കടുത്ത ശിക്ഷകൾ നടപ്പിലാക്കുന്നതെന്ന് എംപിമാർ വ്യക്തമാക്കി. സഭാ സമ്മേളനത്തിനിടെ ഗവൺമെന്റ് ആരോഗ്യ സ്ഥാപനങ്ങളിൽ കൂടുതൽ സ്വദേശി മെഡിക്കൽ ബിരുദധാരികളെ, പ്രത്യേകിച്ച് ദന്തഡോക്ടർമാരെ നിയമിക്കണമെന്നും അംഗങ്ങൾ ആവശ്യപ്പെട്ടു.
നാഷണൽ ഹെൽത്ത് റെഗുലേറ്ററി അതോറിറ്റിയുടെ (NHRA) കണക്കുകൾ പ്രകാരം ബഹ്റൈനിൽ നിലവിൽ 367 ലൈസൻസുള്ള അലൈഡ് മെഡിക്കൽ സെന്ററുകളാണുള്ളത്. കർശനമായ പരിശോധനകൾ കാരണം ഈ മേഖലയിലെ നിയമലംഘനങ്ങൾ വലിയ തോതിൽ കുറഞ്ഞതായും അധികൃതർ ചൂണ്ടിക്കാട്ടി. 2023-ൽ 27 നിയമലംഘനങ്ങൾ റിപ്പോർട്ട് ചെയ്ത സ്ഥാനത്ത് 2026-ൽ ഇതുവരെ ആറ് കേസുകൾ മാത്രമാണ് രേഖപ്പെടുത്തിയിട്ടുള്ളത്.
essr
