ധനസമാഹരണത്തിന് കർശന നിയന്ത്രണങ്ങളുമായി ബഹ്‌റൈൻ; നിയമലംഘകർക്ക് കടുത്ത പിഴയും തടവുശിക്ഷയും

പ്രദീപ് പുറവങ്കര

മനാമ: രാജ്യത്തെ ചാരിറ്റി പ്രവർത്തനങ്ങൾക്കും ധനസമാഹരണത്തിനും കർശന നിയന്ത്രണങ്ങൾ ഏർപ്പെടുത്തി ബഹ്‌റൈൻ. മണി ലോണ്ടറിംഗ് (കള്ളപ്പണം വെളുപ്പിക്കൽ), ഭീകരവാദ പ്രവർത്തനങ്ങൾക്കുള്ള ധനസഹായം എന്നിവ തടയുന്നതിനും സുരക്ഷാ മുൻകരുതലുകൾ ശക്തമാക്കുന്നതിനുമായാണ് പുതിയ നിയമ ഭേദഗതി കൊണ്ടുവന്നത്.

2013-ലെ ധനസമാഹരണ നിയമത്തിൽ മാറ്റങ്ങൾ വരുത്തിക്കൊണ്ടുള്ള 2025-ലെ 39-ാം നമ്പർ ഡിക്രി നിയമപ്രകാരം, നിയമലംഘകർക്ക് 10,000 ദിനാർ വരെ ഭരണപരമായ പിഴയും കഠിനമായ തടവുശിക്ഷയും ലഭിക്കും. മന്ത്രാലയത്തിന്റെ മുൻകൂർ അനുമതിയില്ലാതെ ശേഖരിച്ച സംഭാവനകൾ രാജ്യത്തിന് പുറത്തേക്ക് അയക്കുന്നതിനും പുതിയ നിയമം വിലക്ക് ഏർപ്പെടുത്തിയിട്ടുണ്ട്.

ധനസമാഹരണവുമായി ബന്ധപ്പെട്ട അപകടസാധ്യതകൾ വിലയിരുത്തുന്നതിനും നിരീക്ഷിക്കുന്നതിനുമുള്ള അധികൃതരുടെ പങ്ക് പുതിയ പരിഷ്കാരങ്ങൾ വിപുലമാക്കുന്നു. ദേശീയ സുരക്ഷാ മുൻഗണനകളും അന്താരാഷ്ട്ര സാമ്പത്തിക മാനദണ്ഡങ്ങളും പാലിക്കുന്നുണ്ടെന്ന് ഉറപ്പാക്കുന്നതിനൊപ്പം ദാതാക്കളെയും ചാരിറ്റബിൾ സ്ഥാപനങ്ങളെയും സംരക്ഷിക്കാനും ഈ മാറ്റങ്ങൾ സഹായിക്കുമെന്ന് എംപി മുഹമ്മദ് ജനാഹി പറഞ്ഞു.

നിയമവിരുദ്ധമായ രീതിയിൽ ധനസമാഹരണം നടത്തുന്നവർക്കെതിരെ കടുത്ത ശിക്ഷാനടപടികളാണ് പ്രഖ്യാപിച്ചിരിക്കുന്നത്. ഭീകരവാദ പ്രവർത്തനങ്ങളുമായി ബന്ധപ്പെട്ട കേസുകളിൽ ജീവപര്യന്തം തടവോ ദീർഘകാല തടവോ ലഭിക്കും. കൂടാതെ 1,00,000 മുതൽ 5,00,000 ദിനാർ വരെ പിഴയും ഒടുക്കേണ്ടി വരും. ലൈസൻസില്ലാതെ പൊതു ആവശ്യങ്ങൾക്കായി ധനസമാഹരണം നടത്തിയാൽ തടവോ 1,000 ദിനാർ വരെ പിഴയോ ലഭിക്കും.

അംഗീകാരമില്ലാത്ത ഏതൊരു സംഭാവനയെക്കുറിച്ചും ഏഴു ദിവസത്തിനുള്ളിൽ ബന്ധപ്പെട്ട മന്ത്രാലയത്തിൽ റിപ്പോർട്ട് ചെയ്യണമെന്നും നിയമം അനുശാസിക്കുന്നു. ഇത്തരം അപേക്ഷകളിൽ 30 ദിവസത്തിനുള്ളിൽ മന്ത്രാലയം തീരുമാനമെടുക്കും. സാമൂഹിക വികസന മന്ത്രാലയത്തിന്റെ കണക്കുകൾ പ്രകാരം, സമീപ വർഷങ്ങളിൽ ധനസമാഹരണ ലൈസൻസുകൾ കുറയുന്നതായും നിയമലംഘനങ്ങൾ വർദ്ധിക്കുന്നതായും കണ്ടെത്തിയിട്ടുണ്ട്.