ഭരണത്തിന്റെ അഹങ്കാരത്തില്‍ ജനങ്ങളെ വലയ്ക്കുന്നു; പൗരത്വ നിയമ ഭേദഗതിയില്‍ ടിക്കാറാം മീണ
മലപ്പുറം: പൗരത്വ നിയമ ഭേദഗതിയില്‍ വിമര്‍ശനവുമായി സംസ്ഥാന മുഖ്യ തെരഞ്ഞെടുപ്പ് ഓഫീസര്‍ ടിക്കാറാം മീണ. ഭരണത്തിന്റെ അഹങ്കാരത്തിലാണ് ജനങ്ങളെ ഇങ്ങനെ വലയ്ക്കുന്നതെന്ന് മീണ പറഞ്ഞു. മതനിരപേക്ഷതയാണ് ഭാരതത്തിന്റെ പൈതൃകം. നമുക്ക് ശക്തമായ ഭരണഘടനയുണ്ടെന്നും ജനാധിപത്യ പാരമ്പര്യത്തില്‍ നാം അഭിമാനിക്കുന്നുവെന്നും മീണ പറഞ്ഞു.
ആരെങ്കിലും ജനങ്ങളെ തമ്മിലടിപ്പിക്കാന്‍ ശ്രമിച്ചാല്‍ അത് നടക്കാന്‍ പോകുന്നില്ല. സഹോദരങ്ങളായി നിന്നവര്‍ ഇന്ന് പരസ്പരം വെല്ലുവിളിക്കുന്നു. വിദ്യാര്‍ത്ഥികളെ വെടിവെക്കുന്ന സംഭവങ്ങളുണ്ടായി. അതല്ല ജനങ്ങള്‍ ആഗ്രഹിക്കുന്നത്, അതല്ല ഭാരതം. ഭാരത നിര്‍മ്മാണത്തിന് വേണ്ടി നമ്മള്‍ സഹിച്ച ത്യാഗങ്ങള്‍ അതില്‍ എല്ലാവര്‍ക്കും തുല്യ സംഭാവനയുണ്ട്. അതുകൊണ്ട് വളരെ ശക്തമായി പ്രതികരിക്കും, ഇതിന് യാതൊരു സംശയവുമില്ല. ഇങ്ങനെയുള്ള ശക്തികളെ തോല്‍പിച്ചതാണ് നമ്മുടെ രാജ്യമെന്നും ടിക്കാറാം മീണ കൂട്ടിച്ചേര്‍ത്തു. തിരൂരങ്ങാടി ഓറിയന്റല്‍ ഹയര്‍ സെക്കന്‍ഡറി സ്‌കൂളിലെ പൂര്‍വ വിദ്യാര്‍ത്ഥി സംഗമം ഉദ്ഘാടനം ചെയ്ത് സംസാരിക്കുകയായിരുന്നു മീണ.
