ജെ.പി. മോർഗൻ ചേസ് ബാങ്ക് കോ-സി.ഇ.ഒയുമായി ബഹ്റൈൻ കിരീടാവകാശി കൂടിക്കാഴ്ച നടത്തി
പ്രദീപ് പുറവങ്കര
മനാമ: പ്രമുഖ ആഗോള ധനകാര്യ സ്ഥാപനമായ ജെ.പി. മോർഗൻ ചേസിന്റെ (JPMorgan Chase) കൊമേർഷ്യൽ ആൻഡ് ഇൻവെസ്റ്റ്മെന്റ് ബാങ്ക് കോ-സി.ഇ.ഒ ഡഗ്ലസ് ബി. പെറ്റ്നോയുമായി ബഹ്റൈൻ കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ റിഫാ കൊട്ടാരത്തിൽ കൂടിക്കാഴ്ച നടത്തി.
ബഹ്റൈന്റെ സാമ്പത്തിക വൈവിധ്യവൽക്കരണത്തിന് ബാങ്കിങ്, ധനകാര്യ മേഖലകൾ നൽകുന്ന സംഭാവനകൾ വളരെ വലുതാണെന്ന് കിരീടാവകാശി കൂടിക്കാഴ്ചയിൽ ചൂണ്ടിക്കാട്ടി. ഹിസ് മജസ്റ്റി കിംഗ് ഹമദ് ബിൻ ഈസ അൽ ഖലീഫയുടെ നേതൃത്വത്തിലുള്ള രാജ്യത്തിന്റെ സമഗ്ര വികസനത്തിന് അനുയോജ്യമായ രീതിയിൽ, ദേശീയ സമ്പദ്വ്യവസ്ഥയിൽ ബാങ്കിങ് മേഖലയുടെ പങ്കാളിത്തം വർദ്ധിപ്പിക്കുന്നതിനുള്ള പുതിയ പദ്ധതികളും പ്രോഗ്രാമുകളും ആവിഷ്കരിക്കേണ്ടതിന്റെ പ്രാധാന്യം അദ്ദേഹം ഊന്നിപ്പറഞ്ഞു. സാമ്പത്തിക സേവനങ്ങളുടെ വികസനത്തിനും സുസ്ഥിര വളർച്ചയ്ക്കുമായി അന്താരാഷ്ട്ര ധനകാര്യ സ്ഥാപനങ്ങളുമായുള്ള തന്ത്രപ്രധാനമായ പങ്കാളിത്തം ശക്തമാക്കുമെന്നും അദ്ദേഹം കൂട്ടിച്ചേർത്തു.
ആഗോള സാമ്പത്തിക രംഗത്തെ പുതിയ ചലനങ്ങളും പരസ്പര താൽപ്പര്യമുള്ള വിവിധ വിഷയങ്ങളും കൂടിക്കാഴ്ചയിൽ ചർച്ചയായി. ബഹ്റൈനിലെ നിക്ഷേപ അന്തരീക്ഷം മെച്ചപ്പെടുത്തുന്നതിനും ബാങ്കിങ് മേഖലയ്ക്ക് നൽകുന്ന ശക്തമായ പിന്തുണയ്ക്കും ഡഗ്ലസ് ബി. പെറ്റ്നോ കിരീടാവകാശിയോട് നന്ദി രേഖപ്പെടുത്തി.
dfgg
