സ്വകാര്യ ആരോഗ്യമേഖലയിലെ നിയമലംഘനങ്ങൾ: കർശന ശിക്ഷാനടപടികൾ വരുന്നു

പ്രദീപ് പുറവങ്കര I ബഹ്റൈൻ

മനാമ: ബഹ്‌റൈനിലെ സ്വകാര്യ ആശുപത്രികൾ, ക്ലിനിക്കുകൾ, ചികിത്സാ കേന്ദ്രങ്ങൾ എന്നിവയുടെ പ്രവർത്തനങ്ങളിൽ നിയമലംഘനം കണ്ടെത്തിയാൽ ഘട്ടംഘട്ടമായി ശിക്ഷാനടപടികൾ സ്വീകരിക്കുന്ന പുതിയ നിയമഭേദഗതി ശൂറാ കൗൺസിൽ പരിഗണിക്കുന്നു. ഡോ. ഇബ്തിസാം അൽ ദലാൽ ഉൾപ്പെടെയുള്ള അഞ്ച് അംഗങ്ങളാണ് 2015-ലെ 21-ാം നമ്പർ നിയമത്തിലെ 23-ാം വകുപ്പിൽ ഭേദഗതി വരുത്താനുള്ള നിർദ്ദേശം സമർപ്പിച്ചത്. നിലവിലുള്ള പിഴത്തുകകളിൽ മാറ്റം വരുത്താതെ തന്നെ ശിക്ഷാനടപടികൾ നടപ്പിലാക്കുന്ന രീതി കൂടുതൽ സുതാര്യവും ക്രമബദ്ധവുമാക്കുകയാണ് ഈ ഭേദഗതിയുടെ പ്രധാന ലക്ഷ്യം. ശിക്ഷാനടപടികൾ കേവലം ശിക്ഷിക്കാൻ വേണ്ടി മാത്രമുള്ളതല്ലെന്നും മറിച്ച് സ്ഥാപനങ്ങളുടെ പ്രവർത്തനം മെച്ചപ്പെടുത്തുന്നതിനും രോഗികളുടെ താൽപ്പര്യങ്ങൾ സംരക്ഷിക്കുന്നതിനുമുള്ള ഉപാധികളാണെന്നും ഡോ. അൽ ദലാൽ വ്യക്തമാക്കി.

പുതിയ ഭേദഗതി പ്രകാരം നിയമലംഘനം തെളിയിക്കപ്പെട്ടാൽ അക്കൗണ്ടബിലിറ്റി കമ്മിറ്റി സ്വീകരിക്കേണ്ട നടപടികൾ കൃത്യമായ ക്രമത്തിൽ നിശ്ചയിച്ചിട്ടുണ്ട്. ആദ്യഘട്ടത്തിൽ രേഖാമൂലമുള്ള മുന്നറിയിപ്പ് നൽകുന്നതിലൂടെ തെറ്റുകൾ തിരുത്താൻ അവസരം നൽകും. തുടർന്ന് രോഗികളെ ബാധിക്കാത്ത രീതിയിൽ ചില സേവനങ്ങൾക്ക് താൽക്കാലിക വിലക്ക് ഏർപ്പെടുത്തുകയോ ഉത്തരവാദികളായ ജീവനക്കാരെ പിരിച്ചുവിടാൻ ശുപാർശ ചെയ്യുകയോ ചെയ്യാം. നിയമലംഘനം തുടരുന്ന സാഹചര്യത്തിൽ പ്രതിദിന പിഴ ഈടാക്കാനും പരമാവധി 20,000 ബഹ്‌റൈനി ദീനാർ വരെ പിഴ ചുമത്താനും നിയമം വ്യവസ്ഥ ചെയ്യുന്നു. ഏറ്റവും ഗുരുതരമായ കേസുകളിൽ സ്ഥാപനത്തിന്റെ ലൈസൻസ് റദ്ദാക്കുകയോ താൽക്കാലികമായി സസ്പെൻഡ് ചെയ്യുകയോ ചെയ്യും.

നിയമലംഘനത്തിന്റെ ഗൗരവം, അത് ആവർത്തിക്കുന്നുണ്ടോ എന്ന കാര്യം, നിയമലംഘനത്തിലൂടെ ലഭിച്ച ലാഭം, മറ്റുള്ളവർക്കുണ്ടായ ദോഷം എന്നിവ പരിഗണിച്ചായിരിക്കണം ഓരോ സാഹചര്യത്തിലും ശിക്ഷ നിശ്ചയിക്കേണ്ടതെന്ന് കരട് നിയമം വ്യക്തമാക്കുന്നു. നിലവിലെ നിയമത്തിൽ സാമ്പത്തിക പിഴകൾക്ക് മാത്രമായി നിശ്ചയിച്ചിട്ടുള്ള ഈ മാനദണ്ഡങ്ങൾ ഇനി മുതൽ എല്ലാവിധ ഭരണപരമായ നടപടികൾക്കും ബാധകമാകും. ആദ്യ നിയമലംഘനത്തിന് പ്രതിദിനം 1,000 ദീനാർ വരെയും മൂന്ന് വർഷത്തിനുള്ളിൽ ആവർത്തിച്ചാൽ 2,000 ദീനാർ വരെയുമാണ് പ്രതിദിന പിഴ നിശ്ചയിച്ചിട്ടുള്ളത്. എന്നാൽ മൊത്തം പിഴ ശിക്ഷ 20,000 ദീനാറിൽ കവിയാൻ പാടില്ലെന്ന വ്യവസ്ഥയിൽ മാറ്റം വരുത്തിയിട്ടില്ല.

കുറ്റം തെളിയിക്കപ്പെട്ട കേസുകൾ അപ്പീൽ കാലാവധിക്ക് ശേഷം പരസ്യപ്പെടുത്താനും അന്വേഷണത്തിൽ ക്രിമിനൽ കുറ്റങ്ങൾ ശ്രദ്ധയിൽപ്പെട്ടാൽ കേസ് പബ്ലിക് പ്രോസിക്യൂഷന് കൈമാറാനും ഭേദഗതി വ്യവസ്ഥ ചെയ്യുന്നുണ്ട്. സ്വകാര്യ വിദ്യാഭ്യാസ മേഖലയിലുള്ളതിന് സമാനമായി സ്ഥാപനങ്ങളെ തകർക്കാതെ തന്നെ തെറ്റുകൾ തിരുത്താൻ അവസരം നൽകുന്ന ആധുനിക നിയമനിർമ്മാണ രീതിയാണിത്. സ്വകാര്യ ആരോഗ്യമേഖലയെ രാജ്യത്തിന്റെ ആരോഗ്യസംവിധാനത്തിലെ ഒരു പ്രധാന പങ്കാളിയായി കാണുന്ന സർക്കാർ, ഈ മേഖലയിലെ നിക്ഷേപങ്ങളെ പ്രോത്സാഹിപ്പിക്കുന്നതിനൊപ്പം തന്നെ വിശ്വസനീയവും നീതിയുക്തവുമായ ഒരു നിയന്ത്രണ സംവിധാനം ഉറപ്പാക്കാനാണ് ശ്രമിക്കുന്നത്. ശൂറാ കൗൺസിലിന്റെ ലീഗൽ അഡ്വൈസറി കമ്മീഷൻ അംഗീകരിച്ച ഈ കരട് നിയമം ഇനി സർവീസസ് കമ്മിറ്റി വിശദമായി പഠിക്കും.