ഇന്‍ക്രെഡിബിള്‍ ഇന്ത്യ ബ്രാന്‍ഡ് അംബാസിഡര്‍ ഇനി ബച്ചൻ : ആമിര്‍ ഖാനെ മാറ്റിയതില്‍ പ്രധാനമന്ത്രി റിപ്പോര്‍ട്ട് തേടി
ദില്ലി: ഇന്‍ക്രെഡിബിള്‍ ഇന്ത്യയുടെ ബ്രാന്‍ഡ് അംബാസിഡര്‍ സ്ഥാനത്തു നിന്ന് ബോളിവുഡ് താരം ആമിര്‍ ഖാനെ നീക്കിയതില്‍ പ്രധാനമന്ത്രി റിപ്പോര്‍ട്ട് തേടി. ആമിറുമായി കരാര്‍ ഉണ്ടായിരുന്നോ എന്ന് ടൂറിസം മന്ത്രി വിശദീകരിക്കണം . പ്രധാനമന്ത്രിയുടെ പ്രിന്‍സിപ്പല്‍ സെക്രട്ടറി നൃപേന്ദ്ര മിശ്രയാണ് മന്ത്രി മഹേഷ് ശര്‍മ്മയ്ക്ക് നിര്‍ദ്ദേശം നല്‍കിയത്.
ഇന്‍ക്രെഡിബിള്‍ ഇന്ത്യ ക്യാമ്പയിനിംഗില്‍ നിന്നും ആമിറിനെ മാറ്റി അമിതാഭ് ബച്ചനെ ബ്രാന്‍ഡ് അംബാസിഡര്‍ സ്ഥാനത്തേക്ക് നിയമിക്കുമെന്ന് ഇന്നലെ റിപ്പോര്‍ട്ടുകള്‍ പുറത്തു വന്നിരുന്നു. കരാര്‍ കാലാവധി കഴിഞ്ഞതിനെ തുടര്‍ന്നാണ് ആമിറിനെ നീക്കിയതെന്നായിരുന്നു നേരത്തേ സര്‍ക്കാര്‍ വ്യക്തമാക്കിയത്. എന്നാൽ പ്രതിഫലമില്ലാത്ത സേവനമായതിനാല്‍ കരാറില്‍ ഒപ്പു വച്ചിരുന്നില്ലെന്നാണ് സൂചന.
കേന്ദ്ര സര്‍ക്കാര്‍ തീരുമാനത്തെ ബഹുമാനിക്കുന്നിവെന്ന് ബ്രാന്‍ഡ് അംബാസിഡര്‍ സ്ഥാനത്തു നിന്നു മാറ്റിയ തീരുമാനത്തോട് ആമിര്‍ പ്രതികരിച്ചു.
