ജി.സി.സി ഏകീകൃത നാവിക പ്രവർത്തന കേന്ദ്രം ബഹ്റൈൻ ഡിഫൻസ് ഫോഴ്സ് ചീഫ് ഓഫ് സ്റ്റാഫ് സന്ദർശിച്ചു
പ്രദീപ് പുറവങ്കര
മനാമ: മേഖലയിലെ നാവിക സുരക്ഷ ശക്തിപ്പെടുത്തുന്നതിൽ പ്രധാന പങ്കുവഹിക്കുന്ന ജി.സി.സി (ഗൾഫ് സഹകരണ കൗൺസിൽ) ഏകീകൃത നാവിക പ്രവർത്തന കേന്ദ്രം (Unified Maritime Operations Centre) ബഹ്റൈൻ ഡിഫൻസ് ഫോഴ്സ് ചീഫ് ഓഫ് സ്റ്റാഫ് ലഫ്റ്റനന്റ് ജനറൽ തിയാബ് ബിൻ സഖർ അൽ നുഐമി സന്ദർശിച്ചു.
കേന്ദ്രത്തിന്റെ പ്രവർത്തനങ്ങൾ, ചുമതലകൾ, പ്രാദേശിക നാവിക സുരക്ഷ ഉറപ്പാക്കുന്നതിലെ പങ്ക് എന്നിവയെക്കുറിച്ച് അദ്ദേഹം വിശദമായി വിലയിരുത്തി. മേഖലയിലെ കപ്പൽ ഗതാഗതവും നാവിക നീക്കങ്ങളും നിരീക്ഷിക്കുക, ജി.സി.സി രാജ്യങ്ങളിലെ നാവികസേനകൾ തമ്മിൽ ഏകോപനം നടത്തുക, സാധ്യതയുള്ള നാവിക ഭീഷണികൾ വിലയിരുത്തുക, പുതിയ വെല്ലുവിളികളെ നേരിടാൻ പ്രവർത്തന പദ്ധതികൾ തയ്യാറാക്കുക തുടങ്ങിയ കാര്യങ്ങളെക്കുറിച്ച് സന്ദർശനത്തിനിടെ അദ്ദേഹത്തിന് വിശദീകരിച്ചു നൽകി.
ജി.സി.സി ഏകീകൃത മിലിട്ടറി കമാൻഡിന് കീഴിൽ പ്രവർത്തിക്കുന്ന ഈ കേന്ദ്രം അത്യാധുനിക നാവിക സാങ്കേതിക സംവിധാനങ്ങളാണ് ഉപയോഗിക്കുന്നത്. സുപ്രധാന കപ്പൽച്ചാലുകളുടെയും നാവിക പാതകളുടെയും സുരക്ഷ ഉറപ്പാക്കുന്നതിനായി അംഗരാജ്യങ്ങളിലെയും പങ്കാളിത്ത രാജ്യങ്ങളിലെയും നാവികസേനകളുമായി അടുത്ത സഹകരണത്തോടെയാണ് കേന്ദ്രം പ്രവർത്തിക്കുന്നത്.
ജി.സി.സി രാജ്യങ്ങൾ തമ്മിലുള്ള ശക്തമായ പ്രതിരോധ സഹകരണത്തിന്റെ പ്രതിഫലനമാണ് ഈ പ്രവർത്തന കേന്ദ്രമെന്ന് ലഫ്റ്റനന്റ് ജനറൽ അൽ നുഐമി പ്രശംസിച്ചു. മേഖലയിലെ നാവികസേനകൾ തമ്മിലുള്ള സൈനിക ഏകോപനവും സംയോജനവും ശക്തമാക്കുന്നതിൽ കേന്ദ്രത്തിന്റെ പങ്ക് വളരെ വലുതാണെന്ന് അദ്ദേഹം ചൂണ്ടിക്കാട്ടി.
കൂട്ടായ ഏകോപനം മെച്ചപ്പെടുത്തുന്നതിലൂടെയും നാവിക സജ്ജത വർദ്ധിപ്പിക്കുന്നതിലൂടെയും അറബിക്കടലിലെ സുരക്ഷിതമായ ഗതാഗതം ഉറപ്പാക്കാനും മേഖലയിലെ നാവിക സുരക്ഷയ്ക്കും സ്ഥിരതയ്ക്കും ഈ കേന്ദ്രം വലിയ സംഭാവന നൽകുന്നുണ്ടെന്ന് ചീഫ് ഓഫ് സ്റ്റാഫ് കൂട്ടിച്ചേർത്തു.
dsfdf
