കോഹ്ലിക്ക് സെഞ്ച്വറി; ഇന്ത്യ മികച്ച നിലയിൽ

ഷീബ വിജയ൯

റാഞ്ചി: ദക്ഷിണാഫ്രിക്കക്കെതിരായ ഏകദിന ക്രിക്കറ്റ് പരമ്പരയിലെ ആദ്യ മത്സരത്തില്‍ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ മികച്ച നിലയിൽ. 39 ഓവറിൽ നാലു വിക്കറ്റ് നഷ്ടത്തിൽ 254 റൺസെന്ന നിലയിലാണ് ഇന്ത്യ ഇപ്പോൾ. അർധസെഞ്ചുറി നേടിയ രോഹിത് ശർമ പുറത്തായെങ്കിലും, 102 പന്തിൽനിന്ന് സെഞ്ച്വറി നേടിയ കോഹ്ലി ക്രീസിലുണ്ട്.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യക്ക് തുടക്കത്തിൽ തന്നെ 18 റൺസെടുത്ത ഓപണർ യശസ്വി ജയ്‌സ്വാളിനെ നഷ്ടമായി. രണ്ടാം വിക്കറ്റിൽ വിരാട് കോഹ്ലിയും രോഹിത് ശർമയും ചേർന്ന 'രോകോ സഖ്യം' ഇന്ത്യൻ ഇന്നിങ്സിനെ മുന്നോട്ട് നയിച്ചു. തുടക്കത്തിൽ ശ്രദ്ധയോടെ കളിച്ച കോഹ്ലി പിന്നീട് അരങ്ങുവാഴുകയായിരുന്നു. പത്തോവർ അവസാനിക്കുമ്പോൾ 80 റൺസിന് ഒന്ന് എന്ന നിലയിലായിരുന്ന ഇന്ത്യ അടുത്ത പത്തോവറിൽ ടീമിനെ 153-ൽ എത്തിച്ചു. രോകോ സഖ്യം അർധസെഞ്ചുറിയും നേടി.

സ്‌കോർ 161-ൽ നിൽക്കേ, രോഹിത് ശർമയെ എൽ.ബി.ഡബ്ല്യുവിൽ കുരുക്കി മാർക്കോ യാൻസെൻ ഇന്ത്യയുടെ രണ്ടാം വിക്കറ്റ് വീഴ്ത്തി. 51 പന്തിൽ 57 റൺസെടുത്താണ് രോഹിത് പുറത്തായത്. അദ്ദേഹത്തിൻ്റെ ഇന്നിങ്സിൽ അഞ്ച് ഫോറുകളും മൂന്ന് സിക്സറുകളും ഉൾപ്പെടുന്നു. നാലാമനായി ഇറങ്ങിയ ഋതുരാജ് ഗെയ്ക്വാദ് എട്ട് റൺസെടുത്ത് ബാർട്ട്മാന് വിക്കറ്റ് നൽകി മടങ്ങി. തുടർന്നെത്തിയ വാഷിങ്ടൺ സുന്ദർ 13 റൺസെടുത്ത് ബാർട്ട്മാൻ്റെ രണ്ടാമത്തെ ഇരയായി കൂടാരം കയറി. നിലവിൽ വിരാട് കോഹ്ലിയും (123) ക്യാപ്റ്റൻ കെ.എൽ. രാഹുലുമാണ് (18) ക്രീസിലുള്ളത്.

ദക്ഷിണാഫ്രിക്കൻ ക്യാപ്റ്റൻ എയ്ഡൻ മാർക്രം ബൗളിങ് തിരഞ്ഞെടുക്കുകയായിരുന്നു. ടെസ്റ്റിലേറ്റ കനത്ത പരാജയത്തിന് ഏകദിനത്തിലൂടെ മറുപടി നൽകാനൊരുങ്ങുകയാണ് ടീം ഇന്ത്യ ഇന്ന്. പരിക്കേറ്റ ക്യാപ്റ്റൻ ശുഭ്മൻ ഗില്ലും വൈസ് ക്യാപ്റ്റൻ ശ്രേയസ്സ് അയ്യരുമില്ലാത്ത ടീമിനെ കെ.എൽ. രാഹുലാണ് നയിക്കുന്നത്. രാഹുൽ തന്നെയാണ് വിക്കറ്റ് കീപ്പറും. ഇതോടെ ഋഷഭ് പന്തിന് അവസരം ലഭിച്ചതുമില്ല. രോഹിതിനൊപ്പം ഓപണറായി യശസ്വി ജയ്സ്വാൾ എത്തി. മുതിർന്ന ബാറ്റർമാരായ വിരാട് കോഹ്ലിയുടെയും രോഹിത് ശർമയുടെയും രോകോ സഖ്യത്തിന്റെ പ്രകടനവും ഇന്ന് നിർണായകമാവും. നാളുകളായി അവസരം ലഭിക്കാതിരുന്ന ഋതുരാജ് ഗെയ്ക്വാദ് നാലാം സ്ഥാനത്തെത്തി.

സ്പിന്നിന് അനുകൂലമായ റാഞ്ചിയിലെ പിച്ചിൽ സ്പിൻ ഓൾറൗണ്ടർമാരായ വാഷിങ്ടൺ സുന്ദർ, രവീന്ദ്ര ജഡേജ എന്നിവർക്കാണ് മുൻതൂക്കം. സ്പെഷലിസ്റ്റ് സ്പിന്നർ കുൽദീപ് യാദവും ടീമിലിടം പിടിച്ചിട്ടുണ്ട്. ജസ്പ്രീത് ബുംറയ്ക്കും മുഹമ്മദ് സിറാജിനും വിശ്രമം അനുവദിച്ചതിനാൽ ഹർഷിത് റാണ, അർഷ്ദീപ് സിങ്, പ്രസിദ്ധ് കൃഷ്ണ എന്നിവരാണ് പേസ് വിഭാഗത്തിന് നേതൃത്വം നൽകുന്നത്. വിശ്രമത്തിലുള്ള തെംബ ബാവുമയ്ക്ക് പകരം എയ്ഡൻ മാർക്രമാണ് ദക്ഷിണാഫ്രിക്കൻ ക്യാപ്റ്റൻ. നാല് പേസർമാരും ഒരു സ്പിന്നറുമായാണ് ദക്ഷിണാഫ്രിക്ക ഇറങ്ങുന്നത്. പ്രെനലൻ സുബ്രയേനാണ് ഏക സ്പിന്നർ.