ചൂടിന് ആശ്വാസം; ബഹ്റൈനിൽ വരുന്ന ദിവസങ്ങളിൽ ഈർപ്പം കുറയും, കാറ്റ് ശക്തമാകും
പ്രദീപ് പുറവങ്കര
മനാമ: കഴിഞ്ഞ ഏതാനും ദിവസങ്ങളായി തുടരുന്ന കഠിനമായ ചൂടിനും ഉയർന്ന ആർദ്രതയ്ക്കും ആശ്വാസമായി ബഹ്റൈനിൽ കാലാവസ്ഥയിൽ മാറ്റം പ്രതീക്ഷിക്കുന്നതായി ഗതാഗത, വാർത്താവിനിമയ മന്ത്രാലയത്തിന് കീഴിലുള്ള കാലാവസ്ഥാ നിരീക്ഷണ കേന്ദ്രം അറിയിച്ചു. രാത്രിയിലും പുലർച്ചെയും ഈർപ്പത്തിന്റെ അളവ് കുറയുന്നതോടെ വരുന്ന ദിവസങ്ങളിൽ കാലാവസ്ഥ കൂടുതൽ അനുകൂലമാകും.
കഴിഞ്ഞ ദിവസങ്ങളിൽ കാറ്റിന്റെ ദിശയിലുണ്ടായ വ്യതിയാനമാണ് ഉയർന്ന ആർദ്രതയ്ക്ക് കാരണമായത്. വേനൽക്കാലത്തിന്റെ اخിര ഘട്ടത്തിലേക്ക് കടക്കുന്നതോടെ നാളെ മുതൽ കാലാവസ്ഥയിൽ പുരോഗതി പ്രകടമാകും. ബുധനാഴ്ച രാവിലെയോടെ വടക്കുപടിഞ്ഞാറൻ കാറ്റ് ശക്തമാകാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം വ്യക്തമാക്കി. വാരാന്ത്യം വരെ തുടരുന്ന കാറ്റ് ഇടയ്ക്ക് വീശിയടിക്കാൻ സാധ്യതയുള്ളതിനാൽ രാത്രിയിലും പുലർച്ചെയും ചൂടിന്റെ തീവ്രത കുറയും.
കടലിൽ പോകുന്നവരും പൊതുജനങ്ങളും ആവശ്യമായ മുൻകരുതലുകൾ സ്വീകരിക്കണമെന്നും ഔദ്യോഗിക അറിയിപ്പുകൾ ശ്രദ്ധിക്കണമെന്നും അധികൃതർ നിർദ്ദേശിച്ചു.
കഴിഞ്ഞ ദിവസങ്ങളിൽ താപനില 45 ഡിഗ്രി സെൽഷ്യസ് വരെ ഉയരുകയും ആർദ്രത 85 മുതൽ 90 ശതമാനം വരെ എത്തുകയും ചെയ്തിരുന്നു. തുടർച്ചയായ എട്ട് ദിവസത്തോളം ഈ സ്ഥിതി തുടർന്ന ശേഷമാണ് ഇപ്പോൾ മാറ്റം ഉണ്ടാകുന്നത്.
ഇന്ന് താപനില 30 നും 44 നും ഇടയിലായിരിക്കും. ബുധനാഴ്ച 20 നോട്ടിക്കൽ മൈൽ വേഗതയിൽ വടക്കൻ കാറ്റ് വീശുന്നതോടെ കാലാവസ്ഥയിൽ ആശ്വാസം അനുഭവപ്പെടും. വ്യാഴാഴ്ച 25 നോട്ട് വരെ വേഗതയിൽ ശക്തമായ വടക്കുപടിഞ്ഞാറൻ കാറ്റ് വീശാൻ സാധ്യതയുണ്ട്. വെള്ളിയാഴ്ചയും ശനിയാഴ്ചയും സമാനമായ രീതിയിൽ കാലാവസ്ഥ മെച്ചപ്പെട്ട് നിൽക്കുകയും ഓഗസ്റ്റ് അവസാനത്തോടെ ചൂട് കൂടുതൽ മിതമായ നിലയിലേക്ക് എത്തുകയും ചെയ്യും.
ffdg
