കശ്മീരില്‍ സൈന്യത്തിനുനേരെ കല്ലേറ്: സംഘര്‍ഷത്തിനിടെ രണ്ട് മരണം
ശ്രീനഗര്‍:ജമ്മുകശ്മീരില്‍ സുരക്ഷാ സേനയുമായുണ്ടായ ഏറ്റുമുട്ടലില്‍ വിദ്യാര്‍ഥിനിയും യുവാവും കൊല്ലപ്പെട്ടു. പുല്‍വാമ സ്വദേശികളായ ഷായിസ്ത ഹമീദ്(22) , ഡാനിഷ് ഫാറൂഖ് മിര്‍ (19) എന്നിവരാണ് മരിച്ചത്. ഡാനിഷ് എഞ്ചിനിയറിംഗ് വിദ്യാര്‍ത്ഥിയാണ്. ഷായിസ്ത വിദൂര വിദ്യാഭ്യാസത്തിലൂടെ പിജി ചെയ്തുവരികയായിരുന്നു. ഡാനിഷിന് കഴുത്തിലാണ് വെടിയേറ്റത്. ഷായിസ്ത വീടിന്റെ വരാന്തയില്‍ നില്‍ക്കുമ്പോഴായിരുന്നു സംഭവം. തലയ്ക്കും കഴുത്തിനും വെടിയേറ്റ ഷായിസ്തയെ ആശുപത്രിയില്‍ എത്തിക്കുമ്പോഴേക്കും മരിച്ചിരുന്നു. പരിക്കേറ്റ ഒരാളുടെ നില ഗുരുതരമാണ്.സൈന്യവും തീവ്രവാദികളും തമ്മില്‍ നടന്ന ഏറ്റുമുട്ടലിനിടെയാണ് പ്രദേശവാസികളും സൈന്യത്തിനു നേര്‍ക്ക് തിരിഞ്ഞത്. ഏറ്റുമുട്ടലില്‍ ഒരു തീവ്രവാദി കൊല്ലപ്പെട്ടതായി സൈന്യം അവകാശപ്പെട്ടു. സംഭവത്തില്‍ പ്രതിഷേധിച്ച് കശ്മീരില്‍ ഇന്ന് ബന്ദിന് ആഹ്വാനം ചെയ്തിട്ടുണ്ട്.
