അന്താരാഷ്ട്ര യോഗാദിനം ബഹ്റൈനിലും ആചരിച്ചു
മനാമ : അന്താരാഷ്ട്ര യോഗാദിനത്തോട് അനുബന്ധിച്ച് വിവിധ സംഘടനകളുടെ ആഭിമുഖ്യത്തിൽ നിരവധി പരിപാടികളോടെ യോഗാദിനം ആചരിച്ചു. ഇന്ത്യൻ എംബസിയും യൂത്ത്- സ്പോർട്സ് വിഭാഗത്തിന്റെയും സംയുക്താഭിമുഖ്യത്തിൽ ഇസാ ടൗണിലെ സ്പോർട്സ് സിറ്റിയിൽ യോഗാദിനം ആചരിച്ചു. യോഗ തെറാപ്പി സ്പെഷ്യലിസ്റ്റ് ഫാത്തിമ അൽ മൻസൂറി യോഗയുടെ പ്രാധാന്യത്തെ കുറിച്ച് വിശദീകരിച്ചു. നിരവധി പേർ പങ്കെടുത്ത പരിപാടിയിൽ സാമൂഹിക സാംസ്കാരിക രംഗത്തെ പ്രമുഖർ പങ്കെടുത്തു. പരിപാടിയിൽ ലളിതമായ യോഗമുറകളുടെ പരിശീലനവും, യോഗ അഭ്യസിക്കുന്നതിനാവശ്യമായ മാർഗനിർദേശങ്ങളും നൽകി. പ്രവേശനം സൗജന്യമായിരുന്നു. ഇന്ത്യൻ അംബാസിഡർ അലോക് കുമാർ സിൻഹ, ബഹ്റൈനിലെ വിവിധ സംഘടനകളുടെ പ്രതിനിധികൾ, ഐ.സി.ആർ.എഫ് അംഗങ്ങൾ തുടങ്ങി നിരവധി പേർ പങ്കെടുത്തു.
കൂടാതെ ഉമൽഹസത്തിൽ പ്രവർത്തിക്കുന്ന ബഹ്റൈൻ മെഡിറ്റേഷൻ സെന്ററിന്റെ ആഭിമുഖ്യത്തിൽ ‘യോഗ ദ ജേർണി ഓഫ് ദ സെൽഫ് ത്രു ദ സെൽഫ് ടു ദ സെൽഫ്’ എന്ന തലക്കെട്ടിൽ സെമിനാർ സംഘടിപ്പിച്ചു. യോഗയിലൂടെ ശരീരത്തിന്റെയും മനസിന്റെയും സന്തുലിതാവസ്ഥ എങ്ങിനെ നിലനിർത്താമെന്നതിനെ കുറിച്ചുള്ള കൂടുതൽ വിവരങ്ങൾ പങ്കുവെയ്ക്കുകയാണ് ഇത്തരം പരിപാടികൾ സംഘടിപ്പിക്കുന്നതിലൂടെ ലക്ഷ്യമിടുന്നതെന്ന് വിവിധ യോഗാപരിശീലകരുടെ നേതൃത്വത്തിൽ നടന്ന യോഗാദിനാചരണത്തിൽ യോഗ അദ്ധ്യാപകർ വിശദീകരിച്ചു.
