ഡി.ഐ.ജി ഡി.രൂപയ്ക്ക് രാഷ്ട്രപതിയുടെ പോലീസ് മെഡൽ
ബംഗളൂരു : ശശികലയുടെ ജയിലിലെ ആഡംബര ജീവിതത്തെ കുറിച്ച് സർക്കാരിന് റിപ്പോർട്ട് സമർപ്പിച്ച ഡി.ഐ.ജി ഡി. രൂപയ്ക്ക് രാഷ്ട്രപതിയുടെ പോലീസ് മെഡൽ. ഇന്നലെ രാജ്ഭവനിൽ നടന്ന ചടങ്ങിൽ കർണാടക ഗവർണർ വജുഭായ് ആർ. വാല രൂപയ്ക്ക് മെഡൽ സമ്മാനിച്ചു. കർണാടക മുഖ്യമന്ത്രി സിദ്ധരാമയ്യയും ചടങ്ങിൽ പങ്കെടുത്തു. 2016ലും രൂപയ്ക്ക് വിശിഷ്ട സേവനത്തിനുള്ള രാഷ്ട്രപതിയുടെ പോലീസ് മെഡൽ ലഭിച്ചിരുന്നു. അനധികൃത സ്വത്ത് സന്പാദനക്കേസിൽ പരപ്പന അഗ്രഹാര ജയിലിൽ കഴിയുന്ന ശശികല ഉൾപ്പെടെയുള്ള ചിലർക്ക് വി.ഐപി പരിഗണനയാണ് ലഭിക്കുന്നതെന്നും തടവ് ശിക്ഷയ്ക്കിടെ ശശികല പുറത്തിറങ്ങിയിരുന്നുവെന്നും രൂപ വെളിപ്പെടുത്തിയിരുന്നു.
തന്റെ വാദത്തെ സാധൂകരിക്കുന്ന തരത്തിലുള്ള ദൃശ്യങ്ങൾ അവർ നേരത്തെ സർക്കാരിന് കൈമാറി. ശശികല ജയിലിൽ ആഡംബരജീവിതം നയിക്കുകയാണെന്നും അതിനായി രണ്ടുകോടിയോളം രൂപ അവർ മുടക്കിയിട്ടുണ്ടെന്നും റിപ്പോർട്ടിൽ പരാമർശിച്ചിരുന്നു. ശശികലയുടെ ജയിൽ ജീവിതം സംബന്ധിച്ച വെളിപ്പെടുത്തൽ വലിയ വിവാദങ്ങൾക്കാണ് തിരികൊളുത്തിയത്. ഇതോടെ നിജസ്ഥിതി പരിശോധിക്കാൻ പ്രത്യേക കമ്മിറ്റിയെ സർക്കാർ നിയോഗിക്കുകയായിരുന്നു.
