കാലിയ റഫീഖ് മംഗളൂരുവിൽ കൊല്ലപ്പെട്ടു
മംഗളൂരു: കൊലപാതകം അടക്കം നിരവധി ക്രിമിനല്‍ കേസുകളില്‍ പ്രതിയായ ഉപ്പള മണിമുണ്ടയിലെ കാലിയ റഫീഖ് (38) മംഗളൂരുവില്‍ കൊല്ലപ്പെട്ടു. മംഗളൂരു കെ.സി റോഡിനു സമീപം കെട്ടേക്കാറില്‍ വച്ചാണ് ടിപ്പര്‍ ലോറിയിലെത്തിയ സംഘം റഫീഖിനെ വെട്ടിക്കൊന്നത്. ചൊവ്വാഴ്ച രാത്രി 11.45 മണിയോടെയായിരുന്നു സംഭവം.
റഫീഖ് സഞ്ചരിച്ച റിറ്റ്‌സ് കാറിനെ മിനി ടിപ്പറില്‍ പിന്തുടര്‍ന്ന സംഘം കെട്ടേക്കാറില്‍ വെച്ച് കാറില്‍ ഇടിക്കുകയും, റഫീഖിനെ വെട്ടിക്കൊല്ലുകയുമായിരുന്നു. വിവരമറിഞ്ഞ് ഉള്ളാള്‍ എസ്.ഐ ഗോപീകൃഷ്ണയുടെ നേതൃത്വത്തിലുള്ള പൊലിസ് സംഘം സ്ഥലത്തെത്തി അന്വേഷണം ആരംഭിച്ചു. മൃതദേഹം ദേര്‍ളക്കട്ട കെ.എസ് ഹെഡ്‌ഗെ ആശുപത്രിയില്‍ സൂക്ഷിച്ചിരിക്കുകയാണ്. ഉപ്പളയിലെ ഗുണ്ടാ നേതാവായിരുന്ന മുത്തലിബിനെ വീടിന് സമീപത്ത് വെച്ച് കാര്‍ തടഞ്ഞ് വെടിവെച്ചും വെട്ടിയും കൊന്ന കേസിലും റഫീഖ് പ്രതിയാണ്.
