ജീവകാരുണ്യ പ്രവർത്തനങ്ങളിൽ സുതാര്യത ഉറപ്പാക്കാൻ പുതിയ നിയമം; ബഹ്‌റൈൻ ശൂറ കൗൺസിൽ ചർച്ച ചെയ്യും

പ്രദീപ് പുറവങ്കര

മനാമ: ജീവകാരുണ്യ പ്രവർത്തനങ്ങൾക്കായി ധനസമാഹരണം നടത്തുന്നവർ ഫണ്ടിന്റെ ഉറവിടം, വിനിയോഗം എന്നിവ വെളിപ്പെടുത്തണമെന്നും ഓഡിറ്റ് ചെയ്ത റിപ്പോർട്ടുകൾ സമർപ്പിക്കണമെന്നും വ്യവസ്ഥ ചെയ്യുന്ന പുതിയ നിയമഭേദഗതി ബഹ്‌റൈൻ ശൂറ കൗൺസിൽ ചർച്ച ചെയ്യുന്നു. 2013-ലെ ധനസമാഹരണ നിയമത്തിൽ ഭേദഗതി വരുത്തിക്കൊണ്ട് പുറപ്പെടുവിച്ച 2025-ലെ 39-ാം നമ്പർ ഡിക്രി-നിയമം (Decree-Law No. 39 of 2025) പ്രകാരമാണിത്. പൊതുജനങ്ങളിൽ നിന്ന് ശേഖരിക്കുന്ന പണം കള്ളപ്പണം വെളുപ്പിക്കാനോ ഭീകരവാദ പ്രവർത്തനങ്ങൾക്കോ ദുരുപയോഗം ചെയ്യുന്നത് തടയുക എന്നതാണ് ഈ നിയമത്തിന്റെ പ്രധാന ലക്ഷ്യം. ലൈസൻസ് ഉള്ള സംഘടനകൾ ഫണ്ട് ലഭിക്കുന്ന സ്രോതസ്സും അത് ചിലവഴിക്കുന്ന രീതിയും വ്യക്തമായി രേഖപ്പെടുത്തണം. ഓരോ പ്രവർത്തനത്തിന്റെയും റിസ്ക് (Risk) വിലയിരുത്തിക്കൊണ്ടുള്ള ആധുനിക മേൽനോട്ട സംവിധാനമാണ് പുതിയ നിയമം വിഭാവനം ചെയ്യുന്നത്.

പുതിയ ഭേദഗതി പ്രകാരം എല്ലാ സന്നദ്ധ പ്രവർത്തനങ്ങളെയും ഒരേ രീതിയിൽ കാണുന്നതിന് പകരം ദുരുപയോഗം ചെയ്യാൻ കൂടുതൽ സാധ്യതയുള്ള പ്രവർത്തനങ്ങളിൽ കൂടുതൽ ശ്രദ്ധ കേന്ദ്രീകരിക്കാൻ അധികൃതർക്ക് സാധിക്കും. ഇതിനെ റിസ്ക് അധിഷ്ഠിത മേൽനോട്ടം എന്നാണ് വിശേഷിപ്പിക്കുന്നത്. നിയമലംഘനങ്ങളുടെ ഗൗരവം അനുസരിച്ച് ക്രിമിനൽ നടപടികൾക്ക് പുറമെ അഡ്മിനിസ്ട്രേറ്റീവ് പിഴകളും ചുമത്താൻ പുതിയ നിയമം അധികാരം നൽകുന്നുണ്ട്. ഫിനാൻഷ്യൽ ആക്ഷൻ ടാസ്ക് ഫോഴ്സിന്റെ (FATF) അന്താരാഷ്ട്ര മാനദണ്ഡങ്ങൾ പാലിക്കുന്നതിനും രാജ്യത്തിന്റെ സാമ്പത്തിക ഭദ്രത ഉറപ്പാക്കുന്നതിനുമാണ് ഈ കടുത്ത നടപടികൾ സ്വീകരിക്കുന്നത്.

2026-ൽ നടക്കാനിരിക്കുന്ന എഫ്.എ.ടി.എഫ് വിലയിരുത്തലിൽ ബഹ്‌റൈൻ മികച്ച നിലവാരം പുലർത്തേണ്ടതുണ്ട്. നിയമം നടപ്പിലാക്കുന്നതിൽ വീഴ്ച വരുത്തിയാൽ രാജ്യം ഗ്രേ ലിസ്റ്റിൽ ഉൾപ്പെടാൻ സാധ്യതയുണ്ടെന്നും ഇത് സാമ്പത്തിക മേഖലയെയും നിക്ഷേപങ്ങളെയും ദോഷകരമായി ബാധിക്കുമെന്നും ശൂറ കൗൺസിലിലെ സർവീസസ് കമ്മിറ്റി മുന്നറിയിപ്പ് നൽകി. മൂന്ന് ആർട്ടിക്കിളുകളുള്ള ഈ നിയമഭേദഗതി സഭയുടെ അംഗീകാരത്തിനായി സമർപ്പിച്ചിരിക്കുകയാണ്.