ഖുർ-ആൻ പഠനകേന്ദ്രങ്ങൾ ജീവിത സംസ്കരണത്തിന്‍റെ ഉയർ‍ന്ന പാഠശാലകൾ : സി.എ സഈദ് ഫാറൂഖി
കുവൈത്ത് : വ്യക്തി ജീവിതത്തിലെ സംസ്കരണത്തിലൂടെ, മനുഷ്യന്‍റെ സ്വന്തത്തോടും സമൂഹത്തോടും ഉത്തരവാദിത്വത്തോടെ സമീപിക്കുന്നതിനുള്ള പ്രായോഗിക പാഠങ്ങളാണ് വിശുദ്ധ ഖുർ-ആൻ മുന്നോട്ട് വെക്കുന്നതെന്നും ദൈവത്തിനോട് പൂർ‍ണമായി സമർ‍പ്പിക്കുന്നതിനോടൊപ്പം സഹജീവികളോടും പ്രകൃതിയോടും നീതി പുലർ‍ത്തിക്കൊണ്ട് ആത്മീയവും ഭൗതികവുമായി ജീവിത പരിസരം കെട്ടിപ്പടുക്കുവാൻ ഖുർ-ആൻ നിരന്തരം പ്രേരിപ്പിച്ചുകൊണ്ടിരിക്കുന്നുവെന്നും പ്രഗത്ഭ പണ്ധിതനും കോഴിക്കോട് ട്രെയിനിംഗ് കോളേജ് മുൻ ഇൻ്‍സ്ട്രക്ടറുമായ സി.എ സഈദ് ഫാറൂഖി അഭിപ്രായപ്പെട്ടു. ഇന്ത്യൻ ഇസ്്ലാഹി സെന്‍റർ ഫർ‍വാനിയയിലെ ഐഡിയൽ ഓഡിറ്റോറിയത്തിൽ സംഘടിപ്പിച്ച ഖുർ-ആൻ സമ്മേളനത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം.
ഖുർ-ആനിക സന്ദേശങ്ങളുടെ സമഗ്രതയെ നഷ്ടപ്പെടുത്തുന്ന പഠന രീതികൾ സമൂഹത്തിൽ നിലനിൽ‍ക്കുന്നതായും ഖുർ-ആനിക സന്ദേശങ്ങൾ സന്പൂർ‍ണമായി സ്വീകരിക്കപ്പെടുന്നേടത്താണ് ഇഹപര വിജയം സാധ്യമാവുകയെന്നും സഈദ് ഫാറൂഖി വിശദീകരിച്ചു. ഖുർ-ആൻ പാരായണ ശാസ്ത്രത്തിലും വിജ്ഞാനീയങ്ങളിലും ഡോക്ടറേറ്റ് നേടി ഡോ. ഫൈസൽ അബ്ദുല്ല ഖുർ-ആൻ സമ്മേളം ഉദ്ഘാടനം ചെയ്തു. വിശുദ്ധ ഖുർ-ആൻ വ്യതിരിക്തമാകുന്നത് അതിന്‍റെ ലളിതമായ ആശയ സമൃദ്ധികൊണ്ടാണെന്ന് ഉദ്ഘാടന പ്രസംഗത്തിലൂടെ ഡോ. ഫൈസൽ അബ്ദുല്ല പറഞ്ഞു. മനുഷ്യ ജീവിതത്തിലെ സകല മേഖലകളുടെയും വിജയത്തിനും നിയതമായ അവന്‍റെ മുന്നോട്ടുള്ള ഗമനത്തിനും ആവശ്യമായ നിയന്ത്രണങ്ങളാണ് നോന്പിലൂടെ ലഭിക്കുന്നതെന്നും ഭക്തിയുടെയും സംസ്കരണത്തിന്‍റെയും കാരുണ്യത്തിന്‍റെയും നാളായ റമളാൻ മാസം പാരത്രിക ജീവിതത്തിന് കൂടുതൽ വിളവെടുപ്പ് നടത്താനുള്ള നല്ലൊരു വേദിയാണെന്നും സംഗമത്തിൽ ക്ലാസെടുത്ത സയ്യിദ് അബ്ദുറഹിമാൻ തങ്ങൾ സൂചിപ്പിച്ചു.
ക്യു.എച്ച്.എൽ.എസ് വിഭാഗം സൂറ. സജദയെ അവലംബിച്ച് സംഘടിപ്പിച്ച പരീക്ഷയിൽ ആദ്യ മൂന്ന് സ്ഥാനങ്ങൾ യഥാക്രമം നേടിയ ഗുൽ‍ജീന ജബ്ബാർ (കുന്ദംകുളം), ഷമീമുള്ള സലഫി (ഒതായി), ശൈലജ അബൂബക്കർ (വടക്കാഞ്ചേരി) എന്നിവർ‍ക്കുള്ള സമ്മാനങ്ങൾ വിതരണം ചെയ്തു.
പ്രസിഡണ്ട് എം.ടി മുഹമ്മദ് അദ്ധ്യക്ഷത വഹിച്ചു. ജനറൽ സെക്രട്ടറി അബ്ദുൽ ഹമീദ് കൊടുവള്ളി, സഈദ് അൽ ഉതൈബി, അബ്ദുൽ അസീസ് സലഫി, മനാഫ് മാത്തോട്ടം എന്നിവർ സംസാരിച്ചു. ഇബ്രാഹിം കുട്ടി സലഫി, അബ്ദുറഹിമാൻ അടക്കാനി, എൻ.ജി അൻ‍വർ സാദത്ത്, വി.എ മൊയ്തുണ്ണി, സിദ്ധിഖ് മദനി എന്നിവർ പ്രസീഡിയം നിയന്ത്രിച്ചു.
