പുതുവത്സര തലേന്ന് സംസ്ഥാനത്ത് റെക്കോഡ് മദ്യ വിൽപ്പന: ഒറ്റ ദിവസം വിറ്റത് 68.57 കോടിയുടെ മദ്യം
തിരുവനന്തപുരം: പുതുവത്സര തലേന്ന് സംസ്ഥാനത്ത് റെക്കോഡ് മദ്യ വിൽപ്പന. ബെവ്കോ പുറത്തുവിട്ട കണക്കുകൾ പ്രകാരം 68.57 കോടിയുടെ മദ്യമാണ് ഇത്തവണ ഒറ്റ ദിവസം വിറ്റത്. മുൻ വർഷത്തെ അപേക്ഷിച്ച് 8 ശതമാനത്തിന്റെ വർദ്ധനവ്. ക്രിസ്മസ് തലേന്ന് മദ്യവിൽപ്പനയിൽ വലിയ രീതിയിലുള്ള വർദ്ധനവ് ഉണ്ടായിരുന്നു. സമാനമായ രീതിയാണ് പുതുവത്സര തലേന്നും മദ്യ വിൽപ്പന. കഴിഞ്ഞ വർഷം ഇത് 63 കോടിയായിരുന്നു. ഈ വർഷം ക്രിസ്മസ് ദിനത്തിൽ ഇതിൽ എട്ട് ശതമാനം വർദ്ധനവുണ്ടായി.
തിരുവനന്തപുരത്തെ പവർഹൗസ് റോഡിലെ മദ്യവിൽപ്പന ശാലയിൽ 88 ലക്ഷം രൂപയുടെ മദ്യമാണ് ഒരു ദിവസം വിറ്റത്. സംസ്ഥാനത്തെ തന്നെ ഉയർന്ന നിരക്കിലുള്ള വിൽപ്പന ഇതാണ്. ക്രിസ്മസ്−ന്യൂ ഇയർ ഉൾപ്പെടുന്ന 10 ദിവസത്തെ വിൽപ്പനയിലും വർദ്ധനവ് ഉണ്ട്. 522 കോടിയാണ് ഈ കാലയളവിലെ വിൽപ്പന. കഴിഞ്ഞ വർഷം ഇത് 512 കോടിയായിരുന്നു.
