നിപ : യാത്രാ നിയന്ത്രണം യു.എ.ഇ പിൻവലിച്ചു
ദുബൈ : നിപ വൈറസ് ബാധയുടെ പശ്ചാത്തലത്തിൽ കേരളം സന്ദർ‍ശിക്കാൻ സ്വദേശി പൗരന്മാർക്ക് ഏർപ്പെടുത്തിയിരുന്ന നിയന്ത്രണം പിൻവലിച്ചു. കേരളത്തിൽ നിപ വൈറസ്സിന്റെ വ്യാപനം ഫലപ്രദമായി പ്രതിരോധിച്ചു എന്ന ലോകാരോഗ്യസംഘടനയുടെ റിപ്പോർ‍ട്ടിന്റെ അടിസ്ഥാനത്തിലാണ് കേരളത്തിലേക്ക് ഏർപ്പെടുത്തിയിരുന്ന യാത്രാ നിയന്ത്രണം പിൻ‍വലിക്കുന്നതെന്ന് യു.എ.ഇ ആരോഗ്യ മന്ത്രാലയം വ്യക്തമാക്കി. കേരളത്തിലേക്ക് പോകാൻ യാതൊരു നിയന്ത്രണവും ഇപ്പോൾ നിലവിലില്ല. കഴിഞ്ഞമാസം 24നാണ് യു.എ.ഇ ആരോഗ്യമന്ത്രാലയം നിപ വൈറസ് നിയന്ത്രണവിധേയമാകുന്നത് വരെ കേരളത്തിലേക്കുള്ള യാത്ര ഒഴിവാക്കണമെന്ന നിർ‍ദ്ദേശം പുറപ്പെടുവിച്ചത്.
കേരളത്തിൽ നിന്ന് യു.എ.ഇയിലെത്തുന്ന യാത്രക്കാർ‍ക്ക് രോഗലക്ഷണങ്ങളുണ്ടെങ്കിൽ നിരീക്ഷിക്കാനും തീരുമാനിച്ചിരുന്നു. അതേസമയം നിപയുടെ പേരിൽ കേരളത്തിൽ നിന്നുള്ള പഴം, പച്ചക്കറി ഉൽ‍പ്പന്നങ്ങൾ‍ക്ക് പരിസ്ഥിതി മന്ത്രാലയം ഏർപ്പെടുത്തിയ ഇറക്കുമതി വിലക്കും പിൻ‍വലിച്ചേക്കുമെന്നാണ് റിപ്പോർട്ട്. കേരളത്തിലെ വിമാനത്താവളങ്ങളിൽ നിന്ന് ദിവസം 50 ടണ്ണിലേറെ പഴം, പച്ചക്കറി ഉൽ‍പ്പന്നങ്ങളാണ് യു.എ.ഇയിലേക്ക് മാത്രം കയറ്റി അയച്ചിരുന്നത്.
