അഞ്ചു വയസ്സുകാരന് സൗജന്യമായി ശസ്ത്രക്രിയ ചെയ്‍തുനല്‍കി സ്വകാര്യ ആശുപത്രി
കൊല്‍ക്കത്ത: നിര്‍ധനകുടുംബത്തിലെ അഞ്ചു വയസ്സുകാരന് സൗജന്യമായി ശസ്ത്രക്രിയ ചെയ്‍തുനല്‍കി സ്വകാര്യ ആശുപത്രി. കൊല്‍ക്കത്തയിലെ പാര്‍ക്ക് സര്‍ക്കസിലുള്ള ഇൻസ്റ്റിറ്റ്യൂട്ട് ഓഫ് ചൈല്‍ഡ് കെയര്‍ എന്ന ആശുപത്രിയാണ് മൊഹമ്മദ് സീഷാന് എന്ന അഞ്ചുവയസ്സുകാരന് സൗജന്യമായി ശസ്ത്രക്രിയ ചെയ്‍തുനല്‍കി മാതൃകയായത്.
ശരിയായി ശ്വാസമെടുക്കാന്‍ കഴിയാത്ത അപൂര്‍വ രോഗവുമായി കഴിഞ്ഞ ഒക്‍ടോബര്‍ 31നാണ് സീഷാനെ ആശുപത്രിയില്‍ പ്രവേശിപ്പിച്ചത്. ചികിത്സക്ക് പണം കണ്ടെത്താന്‍ കൂലിപ്പണിക്കാരനായ പിതാവിന് കഴിയില്ല എന്ന് മനസ്സിലാക്കിയ ആശുപത്രി അധികൃതര്‍ ഐസിയു കിടക്കയുടെ ഫീസ് ഒഴിവാക്കുകയായിരുന്നു. കുടുംബത്തിന്‍റെ അവസ്ഥ മനസ്സിലാക്കിയ ഡോക്‍ടര്‍മാര്‍ അവരുടെ ഫീസും വേണ്ടെന്നുവെച്ചു.
കുഞ്ഞിന്‍റെ ആരോഗ്യനിലയില്‍ ഏറെ പുരോഗതി ഉണ്ടായിട്ടുണ്ടെങ്കിലും അല്‍പദിവസം കൂടി ആശുപത്രിയില്‍ ചിലവഴിക്കേണ്ടിവരും. രോഗം പൂര്‍ണമായി ഭേദമാവാത്തതിനാല്‍ കൃത്രിമശ്വാസോച്ഛ്വാസയന്ത്രത്തിന്‍റെ സഹായത്തോടെയേ സീഷാന് ശ്വസിക്കാനാവൂ. ഇത്തരം ഒരു യന്ത്രത്തിന് രണ്ടര ലക്ഷത്തോളം രൂപ ചിലവാകും. ഇത് കണ്ടെത്താനായി സമൂഹമാധ്യമങ്ങളിലൂടെ ക്യാമ്പെയിനും ആശുപത്രി അധികൃതര്‍ തുടങ്ങിക്കഴിഞ്ഞു.
