പ്രവാസി ഭാരതീയ എക്‌സലൻസ് അവാർഡ് പാമ്പാവാസൻ നായർക്ക് സമ്മാനിച്ചു
പ്രദീപ് പുറവങ്കര /മനാമ
മാനുഷിക സേവനങ്ങൾക്കുള്ള അംഗീകാരമായി ബഹ്റൈനിലെ അമദ് ഗ്രൂപ്പ് ഓഫ് കമ്പനീസ് ചെയർമാനും മാനേജിംഗ് ഡയറക്ടറുമായ പാമ്പാവാസൻ നായർക്ക് ഡോ. മംഗളം സ്വാമിനാഥൻ പ്രവാസി ഭാരതീയ എക്‌സലൻസ് അവാർഡ് 2025 സമ്മാനിച്ചു. കേന്ദ്ര ഉപഭോക്തൃകാര്യ, ഭക്ഷ്യ-പൊതുവിതരണ സഹമന്ത്രി നിമബെൻ ജെ. ബംഭാനിയയുടെ സാന്നിധ്യത്തിൽ, ബി.ജെ.പി. സീനിയർ നേതാവും മുൻ കേന്ദ്ര മാനവ വിഭവശേഷി മന്ത്രിയുമായ ഡോ. മുരളി മനോഹർ ജോഷിയാണ് പുരസ്‌കാരം നൽകിയത്. ന്യൂഡൽഹിയിലെ എൻ.ഡി.എം.സി. കൺവെൻഷൻ സെൻ്ററിൽ വെച്ചാണ് അവാർഡ് ദാന ചടങ്ങ് നടന്നത്.
ഭവനരഹിതർക്ക് വീടുകൾ, കുട്ടികൾക്ക് വിദ്യാഭ്യാസ സഹായം, ചികിത്സാ സഹായം, വിവാഹ ചെലവുകൾക്കുള്ള പിന്തുണ എന്നിവയാണ് പാമ്പാവാസൻ നായർ സി.എം.എൻ. ട്രസ്റ്റ് വഴി നൽകിവരുന്നത്. 2024 ഓഗസ്റ്റിൽ ആരംഭിച്ച “എ ഹോം ഓഫ് യുവർ ഓൺ” അഞ്ച് വർഷത്തിനുള്ളിൽ സാമ്പത്തികമായി പിന്നാക്കം നിൽക്കുന്ന 50 കുടുംബങ്ങൾക്ക് സ്ഥിരം ഭവനങ്ങൾ നിർമ്മിക്കാൻ ലക്ഷ്യമിടുന്നു. ഇതിൽ 20 വീടുകൾ ഇതിനോടകം തന്നെ വിജയകരമായി പൂർത്തിയാക്കി അർഹരായ ഗുണഭോക്താക്കൾക്ക് കൈമാറി കഴിഞ്ഞു.
ഡൽഹി ആസ്ഥാനമായുള്ള ഡോ. മംഗളം സ്വാമിനാഥൻ ഫൗണ്ടേഷൻ ഏർപ്പെടുത്തിയ എക്‌സലൻസ് അവാർഡ്, സാമൂഹിക സേവനം, കലയും സംസ്കാരവും, ശാസ്ത്രം, പത്രപ്രവർത്തനം, വൈദ്യശാസ്ത്രം എന്നീ അഞ്ച് പ്രധാന മേഖലകളിലായി രാജ്യ നിർമ്മാണത്തിന് ഗണ്യമായ സംഭാവനകൾ നൽകിയ വ്യക്തികൾക്കും സ്ഥാപനങ്ങൾക്കുമായാണ് നൽകുന്നത്.
efssfasada
