ബാഗ്ദാദ് ഇരട്ട സ്‌ഫോടനത്തിൽ മരണം 130 ആയി
ബാഗ്ദാദ് : ഇറാഖ് തലസ്ഥാനമായ ബാഗ്ദാദില്‍ കഴിഞ്ഞ ദിവസമുണ്ടായ ഇരട്ട ബോംബ് സ്‌ഫോടനത്തില്‍ കൊല്ലപ്പെട്ടവരുടെ എണ്ണം 130 ആയി. നൂറോളം പേര്‍ക്ക് പരുക്കേറ്റിട്ടുണ്ട്. ശനിയാഴ്ച നോമ്പ് തുറന്നതിന് ശേഷം നഗരത്തിലെ തിരക്കേറിയ വ്യാപാര മേഖലയിലേക്ക് സ്‌ഫോടക വസ്തുക്കള്‍ നിറച്ച ട്രക്ക് ഓടിച്ചു കയറ്റി സ്‌ഫോടനം നടത്തുകയായിരുന്നു. സ്‌ഫോടനത്തെതുടര്‍ന്ന് സമീപത്തെ കടകളില്‍ ഭൂരിഭാഗവും കത്തിനശിച്ചിട്ടുണ്ട്.
ബാഗ്ദാദിലെ കരജ ജില്ലയിലാണ് ആദ്യ സ്‌ഫോടനം ഉണ്ടായത്. പിന്നീട് കിഴക്കന്‍ ബാഗ്ദാദിലും സ്‌ഫോടനമുണ്ടായി.
അക്രമണത്തിന്റെ ഉത്തരവാദിത്വം ഐ.എസ് ഏറ്റെടുത്തു. ഇസ്‌ലാമിക് സ്‌റ്റേറ്റിന്റെ നിയന്ത്രണത്തിലായിരുന്ന ഫലൂജ നഗരം സൈന്യം പൂര്‍ണമായും തിരിച്ച് പിടിച്ചതിന് പിന്നാലെയാണ് ഈ സ്‌ഫോടനം.
സംഭവത്തെ തുടര്‍ന്ന് ഇറാഖി സര്‍ക്കാര്‍ രാജ്യത്ത് മൂന്ന് ദിവസത്തെ ദു:ഖാചരണം പ്രഖ്യാപിച്ചു.
