യുദ്ധഭീതി വീണ്ടും ശക്തമാകുന്നു; ഏത് സാഹചര്യത്തെയും നേരിടാൻ യു.എ.ഇ പൂർണ്ണ സജ്ജമെന്ന് മുതിർന്ന ഉദ്യോഗസ്ഥൻ

ശാരിക

അബൂദബി: അമേരിക്കയും ഇറാനും തമ്മിലുള്ള നയതന്ത്ര ചർച്ചകൾ പ്രതിസന്ധിയിലാവുകയും മേഖലയിൽ വീണ്ടും യുദ്ധഭീതി നിഴലിക്കുകയും ചെയ്യുന്ന സാഹചര്യത്തിൽ, ഏത് ഭീഷണിയെയും അതിജീവിക്കാൻ യു.എ.ഇ കൂടുതൽ കരുത്താർജ്ജിച്ചതായി മുതിർന്ന ഉദ്യോഗസ്ഥൻ വ്യക്തമാക്കി. ഫെഡറൽ നാഷണൽ കൗൺസിലിന്റെ പ്രതിരോധം, ആഭ്യന്തരം, വിദേശകാര്യം എന്നിവയ്ക്കായുള്ള സമിതി ചെയർമാൻ ഡോ. അലി റാശിദ് അൽ നുഐമിയാണ് ഇക്കാര്യം വെളിപ്പെടുത്തിയത്. ഫെബ്രുവരി 28-ന് അമേരിക്കയും ഇസ്രായേലും ഇറാനെതിരെ ആക്രമണം നടത്തിയ അന്നത്തെ സാഹചര്യത്തേക്കാൾ വളരെ ഉയർന്ന പ്രതിരോധ സന്നദ്ധതയിലാണ് ഇപ്പോൾ യു.എ.ഇ ഉള്ളതെന്ന് അദ്ദേഹം മാധ്യമങ്ങളോട് പറഞ്ഞു. യുദ്ധം പുനരാരംഭിക്കാനുള്ള സാധ്യത തള്ളിക്കളയാനാകില്ലെന്നും രാജ്യത്തിന്റെയും ജനങ്ങളുടെയും സുരക്ഷ ഉറപ്പാക്കാൻ ആവശ്യമായ എല്ലാ മുൻകരുതലുകളും സ്വീകരിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.

അമേരിക്കയും ഇറാനും തമ്മിൽ നിലനിന്നിരുന്ന വെടിനിർത്തൽ ധാരണകളും സമാധാന ശ്രമങ്ങളും പരാജയപ്പെട്ടതാണ് നിലവിലെ പ്രതിസന്ധിക്ക് കാരണം. ഒരു അന്തിമ സമാധാന കരാറിലെത്താൻ പ്രാഥമിക ധാരണാപത്രങ്ങൾ ഒപ്പുവെച്ചിരുന്നെങ്കിലും, തുടർന്നുണ്ടായ ആക്രമണങ്ങൾ സമാധാന നീക്കങ്ങൾക്ക് വലിയ തിരിച്ചടിയായി. ഹുർമുസ് കടലിടുക്കിൽ കപ്പലുകൾക്ക് നേരെ ഇറാൻ നടത്തിയ ആക്രമണങ്ങളും അതിന് തിരിച്ചടിയായി അമേരിക്ക നടത്തിയ സൈനിക നടപടികളും മേഖലയെ വീണ്ടും യുദ്ധമുനമ്പിലെത്തിച്ചിരിക്കുകയാണ്.

മുൻപ് നടന്ന യുദ്ധഘട്ടങ്ങളിൽ യു.എ.ഇ ഉൾപ്പെടെയുള്ള അയൽരാജ്യങ്ങളിലെ വിമാനത്താവളങ്ങൾ, ഊർജ്ജ കേന്ദ്രങ്ങൾ തുടങ്ങി നിർണായക അടിസ്ഥാന സൗകര്യങ്ങൾക്ക് നേരെ ഇറാൻ ബാലിസ്റ്റിക് മിസൈലുകളും ഡ്രോണുകളും ഉപയോഗിച്ച് വ്യോമാക്രമണം നടത്തിയിരുന്നു. യു.എ.ഇയെ ലക്ഷ്യമിട്ടെത്തിയ 550-ലേറെ ബാലിസ്റ്റിക് മിസൈലുകളെയും 2,265-ഓളം ഡ്രോണുകളെയും അത്യാധുനിക പ്രതിരോധ സംവിധാനങ്ങൾ ഉപയോഗിച്ച് തടുക്കാനും തകർക്കാനും സാധിച്ചിരുന്നു.

സുരക്ഷാ ഭീഷണികൾ ശക്തമായി നിലനിൽക്കുമ്പോഴും, ഇറാനുമായി ചർച്ചകൾ നടത്താനും നയതന്ത്ര മാർഗ്ഗങ്ങളിലൂടെ പ്രശ്നങ്ങൾ പരിഹരിക്കാനുമാണ് യു.എ.ഇ ഇപ്പോഴും മുൻഗണന നൽകുന്നതെന്ന് അൽ നുഐമി വ്യക്തമാക്കി. പരസ്പര വിശ്വാസം വളർത്താൻ ഇറാൻ ഒരു ചുവട് മുന്നോട്ട് വെച്ചാൽ അതിനേക്കാൾ മികച്ച രീതിയിൽ യു.എ.ഇ പ്രതികരിക്കും. എങ്കിലും നിലവിലെ സാഹചര്യത്തിൽ ഇറാനെ പൂർണ്ണമായി വിശ്വസിക്കാനാകില്ലെന്നും രാജ്യത്തിന്റെ സുരക്ഷ ഉറപ്പാക്കാനുള്ള എല്ലാ നടപടികളും തുടരുമെന്നും അദ്ദേഹം ആവർത്തിച്ചു.