കൊറോണ: കാസർകോടിന് ഇന്ന് ഏറെ നിർണായകം: സമൂഹവ്യാപനം ഉണ്ടായോ എന്ന് ഇന്നറിയാം
കാസർഗോഡ്: കാസർഗോടിന് ഇന്നും നാളെയും ഏറെ നിർണായകം. കൊറോണവൈറസ് കാസർകോട്ട് സമൂഹ വ്യാപനത്തിന് ഇടയാക്കിയോ എന്ന് ഇന്ന് അറിയാനാകും. സമ്പർക്കപട്ടികയിൽ ഉള്ളവരുടേത് ഉൾപ്പടെ 77 പേരുടെ സാമ്പിളാണ് പരിശോധനയ്ക്ക് അയച്ചിട്ടുള്ളത്. ഇതിൽ പോസിറ്റീവ് കേസുകൾ ഉണ്ടെങ്കിൽ ഇന്ന് അറിയാം.
ഈ പരിശോധനാഫലത്തിലൂടെ സമൂഹവ്യാപനം ഉണ്ടായോ എന്നകാര്യം വ്യക്തമാകും. കൂടുതൽ പേർ രോഗലക്ഷണങ്ങൾ പ്രകടിപ്പിക്കുന്നതാണ് ജില്ലാ ഭരണകൂടത്തിന് ആശങ്കയുണ്ടാക്കുന്നത്.രണ്ടാമത്തെ രോഗിയുമായി സമ്പർക്കം പുലർത്തിയവരുടെ ഫലവും ഇന്ന് വരും. 44 പേർ ഇതിനോടകം കാസർകോട് ജില്ലയിൽ രോഗം സ്ഥിരീകരിച്ചിട്ടുള്ളത്. രണ്ടാമത്തെ രോഗിയിൽ നിന്ന് ഏഴാമത്തെ രോഗിയിലേക്ക് എത്തിയ 20 മിനിറ്റിനെക്കുറിച്ചാണ് തങ്ങൾക്ക് ആശങ്കയെന്ന് ജില്ലാകളക്ടർ ഡോ.ഡി സജിത്ബാബു വ്യക്തമാക്കുന്നു. ഈ 20 മിനിട്ടിനുള്ളിൽ സമൂഹ വ്യാപനം നടന്നിട്ടുണ്ടോയെന്ന് ഇന്നും നാളെയുമായി ലഭിക്കുന്ന പരിശോധനാഫലങ്ങളിലൂടെ അറിയാനാകും.
