ഒറ്റദിവസം 99 കേസ്: ഇന്ത്യയില്‍ കോവിഡ് ബാധിതരുടെ എണ്ണം 511ആയി
ന്യൂഡൽഹി: മഹാരാഷ്ട്രയിലും കർണാടകയിലും പുതിയ കേസുകൾ റിപ്പോർട്ട് ചെയ്യപ്പെട്ടതോടെ രാജ്യത്ത് കോവിഡ് ബാധിതരുടെ എണ്ണം 511 ആയി. തിങ്കളാഴ്ച മാത്രം 99 പുതിയ കേസുകൾ റിപ്പോർട്ട് ചെയ്തു കൊണ്ട് കോവിഡ് ബാധിതരുടെ എണ്ണത്തിൽ ആശങ്കപ്പെടുത്തുന്ന വർധനവാണ് ഉണ്ടായത്.
ഗുജറാത്തിലും മണിപ്പുരിലും പുതിയ കേസുകൾ സ്ഥിരീകരിച്ചിട്ടുണ്ട്. ചെവ്വാഴ്ച രാജ്യത്താകമാനം 10 പുതിയ കേസുകളാണ് റിപ്പോർട്ട് ചെയ്യപ്പെട്ടത്. കോവിഡ് ബാധിതരായ 511 പേരിൽ 36 പേർ രോഗമുക്തി നേടി. യു.കെയിലേക്ക് യാത്രപോയ മണിപ്പുരിൽ നിന്നുള്ള 23കാരന് രോഗം സ്ഥിരീകരിച്ചതോടെ കൊറോണ വ്യാപനമേൽക്കാതിരുന്ന വടക്കു കിഴക്കൻ സംസ്ഥാനങ്ങളെയും ആശങ്കയിലാക്കിയിട്ടുണ്ട്.
മഹാരാഷ്ട്രയിലാണ് ഏറ്റവും കൂടുതൽ കോവിഡ് ബാധിതരുള്ളത്. തിങ്കളാഴ്ച മാത്രമായി 23 കേസുകളാണ് ഇവിടെ പുതുതായി വന്നത്. 97 കോവിഡ് ബാധിതരെയാണ് മഹാരാഷ്ട്രയിൽ ഇതുവരെ സ്ഥിരീകരിച്ചത്.
95 കേസുകളുമായി കേരളം തൊട്ടു പിറകെയുണ്ട്.
കർണാടകയിൽ 37 പേരിലാണ് കോവിഡ് സ്ഥിരീകരിച്ചത്. ചൊവ്വാഴ്ച മാത്രം നാലു കേസുകൾ സ്ഥിരീകരിച്ചു.
10 വിദേശികളുൾപ്പെടെ തെലങ്കാനയിൽ 33പേരിൽ കോവിഡ് സ്ഥിരീകരിച്ചു.
33 പോസിറ്റീവ് കേസുകളാണ് ഉത്തർപ്രദേശിലുള്ളത്.
ഗുജറാത്ത്(30), ഡൽഹി(29), രാജസ്ഥാൻ(32), ഹരിയാന(26), പഞ്ചാബ്(23), ലഡാക്ക്(13), തമിഴ്നാട്(12), പശ്ചിമബംഗാൽ(7), മധ്യപ്രദേശ്(6), ചണ്ഡീഗഡ്(6),ആന്ധ്രപ്രദേശ്(7),ജമ്മുകശ്മീർ(4), ഉത്തരാഖണ്ഡ്(5), ഹിമാചൽ പ്രദേശ്(3),ബീഹാർ(2), ഒറീസ്സ(2) പുതുച്ചേരി(1). ചത്തീസ്ഗഡ്(1) എന്നിങ്ങനെ പോകുന്നു മറ്റ് സംസ്ഥാനങ്ങളിലെ കോവിഡ് ബാധിതരുടെ എണ്ണം.
