നാട്ടികയിൽ ടോൾ പിരിവ് താത്കാലികമായി നിർത്തിവെച്ചു; വിദഗ്ധ സംഘം പരിശോധന നടത്തും
ശാരിക
തൃശൂർ: തൃശൂർ നാട്ടികയിൽ ടോൾ പിരിവ് താത്കാലികമായി നിർത്തിവെച്ചതായി ദേശീയ ഹൈവേ അതോറിറ്റി അറിയിച്ചു. വിദഗ്ധ സംഘം സ്ഥലം പരിശോധിച്ച് റിപ്പോർട്ട് സമർപ്പിക്കുന്നതുവരെ ടോൾ പിരിവ് തുടരരുതെന്നാണ് കർശന നിർദേശം നൽകിയിരിക്കുന്നത്. ജില്ലാ കലക്ടറുടെ റിപ്പോർട്ട് കൂടി വിലയിരുത്തിയായിരിക്കും ടോൾ പിരിവ് പുനരാരംഭിക്കുന്നത് സംബന്ധിച്ച അന്തിമ തീരുമാനമുണ്ടാകുക.
ദേശീയപാതയിലെ നിർമാണപ്രവർത്തനങ്ങൾ പൂർത്തീകരിക്കുന്നതിന് മുൻപ് തന്നെ ടോൾ പിരിവ് ആരംഭിച്ചതിനെ തുടർന്ന് പ്രദേശവാസികളും യാത്രക്കാരും വിവിധ രാഷ്ട്രീയ കക്ഷികളും കഴിഞ്ഞ ദിവസം ശക്തമായ പ്രതിഷേധവുമായി രംഗത്തെത്തിയിരുന്നു. തുടർന്നൂണ്ടായ രൂക്ഷമായ സംഘർഷാവസ്ഥയെത്തുടർന്ന്, നിർമാണ പ്രവർത്തനങ്ങൾ പൂർണ്ണമായും തീരുന്നതുവരെ ടോൾ പിരിവ് നിർത്തിവെയ്ക്കാൻ പൊതുമരാമത്ത് മന്ത്രി പി.കെ. ബഷീർ ദേശീയ ഹൈവേ അതോറിറ്റിയോട് ആവശ്യപ്പെടുകയായിരുന്നു. മന്ത്രിയുടെ നിർദേശപ്രകാരമാണ് ഇപ്പോൾ നടപടി സ്വീകരിച്ചിരിക്കുന്നത്.
ബന്ധപ്പെട്ട ഉദ്യോഗസ്ഥരുമായി ചേർന്ന് സ്ഥലം നേരിട്ട് സന്ദർശിക്കാനും പ്രശ്നത്തിന് ശാശ്വത പരിഹാരം കണ്ടെത്തുന്നതിനായി സർവകക്ഷി യോഗം വിളിച്ചുചേർക്കാനും ജില്ലാ കലക്ടർക്കും മന്ത്രി നിർദേശം നൽകിയിട്ടുണ്ട്. ഇതിന്റെ ഭാഗമായി കലക്ടർ, പൊലീസ്, ആർ.ടി.ഒ., എസ്.പി. തുടങ്ങിയ ഉദ്യോഗസ്ഥർ അടങ്ങുന്ന പ്രത്യേക സംഘം പ്രദേശത്തെ നിർമാണപ്രവൃത്തികൾ വിലയിരുത്തും. തുടർന്ന് കലക്ടർ സമർപ്പിക്കുന്ന വിശദമായ റിപ്പോർട്ടിന്റെ അടിസ്ഥാനത്തിലായിരിക്കും ടോൾ പിരിവ് സംബന്ധിച്ച അന്തിമ തീരുമാനങ്ങൾ ഉണ്ടാവുക. നിർമാണ പ്രവർത്തനങ്ങൾ പൂർത്തിയാകാത്ത ഭാഗങ്ങളിൽ പരിശോധന നടത്തി, യാത്രക്കാർക്ക് യാതൊരുവിധ ബുദ്ധിമുട്ടുകളും ഉണ്ടാകാത്ത രീതിയിൽ പണികൾ വേഗത്തിൽ തീർക്കാനുള്ള നടപടികളും സംഘം സ്വീകരിക്കും.
dsfsf
