ബഹ്‌റൈനിൽ പ്രവർത്തനം നിലച്ച 62 സംഘടനകളും ക്ലബ്ബുകളും പിരിച്ചുവിട്ടു: പണം കൈകാര്യം ചെയ്യുന്നതിനും പ്രവർത്തനങ്ങൾക്കും വിലക്ക്

പ്രദീപ് പുറവങ്കര

മനാമ: അഞ്ചു വർഷത്തിലേറെയായി യാതൊരുവിധ പ്രവർത്തനങ്ങളും നടത്താതെ നിശ്ചലമായിക്കിടന്ന 62 അസോസിയേഷനുകളും സോഷ്യൽ/സാംസ്കാരിക ക്ലബ്ബുകളും നിർബന്ധിതമായി പിരിച്ചുവിട്ടുകൊണ്ട് ബഹ്‌റൈൻ സാമൂഹിക വികസന മന്ത്രി ഉസാമ ബിൻ സാലിഹ് അൽ-അലവി ഉത്തരവിറക്കി. നിയമ വ്യവസ്ഥകളും സംഘടനകളുടെ ഭരണഘടനയും ലംഘിച്ചതിനെ തുടർന്നാണ് നടപടി.

ഔദ്യോഗിക ഗസറ്റിൽ പ്രസിദ്ധീകരിച്ച 2026-ലെ 66-ാം നമ്പർ ഉത്തരവ് പ്രകാരം, പൗരസമൂഹ സംഘടനകളുടെ പിന്തുണാ വകുപ്പ് സമർപ്പിച്ച റിപ്പോർട്ടിന്റെ അടിസ്ഥാനത്തിലാണ് ഈ തീരുമാനം. ഒക്ടോബർ 11-ന് സമർപ്പിച്ച റിപ്പോർട്ടിൽ ഈ സംഘടനകൾ വർഷങ്ങളായി പ്രവർത്തിക്കുന്നില്ലെന്ന് വ്യക്തമായിരുന്നു.

പിരിച്ചുവിട്ട സംഘടനകളിൽ പ്രമുഖ പ്രാദേശിക, അന്തർദേശീയ അസോസിയേഷനുകളും ക്ലബ്ബുകളും ഉൾപ്പെടുന്നു. ഗൾഫ് കെമിക്കൽ ഡിറ്റർജന്റ്സ് അസോസിയേഷൻ, ജി.സി.സി ഓർത്തോപീഡിക് സർജൻസ് അസോസിയേഷൻ, അറേബ്യൻ ഗൾഫ് സൈക്യാട്രിസ്റ്റ്സ് അസോസിയേഷൻ, ബഹ്‌റൈൻ റൗണ്ട് ടേബിൾ അസോസിയേഷൻ, ബഹ്‌റൈനി അക്കാദമിക്സ് അസോസിയേഷൻ, ബഹ്‌റൈനി യൂണിവേഴ്സിറ്റി ഗ്രാജുവേറ്റ്സ് അസോസിയേഷൻ, വിദേശ നാണയ വ്യാപാരികളുടെ അസോസിയേഷൻ എന്നിവ ഇതിൽ ചിലതാണ്.

ഇതിനുപുറമെ ബഹ്‌റൈൻ ബ്രിഡ്ജ് ക്ലബ്, ബഹ്‌റൈനി ലൈഫ് മേക്കേഴ്‌സ് ക്ലബ്, വിമൻസ് ലീഡർഷിപ്പ് അസോസിയേഷൻ, ഗ്രീക്ക് ലാംഗ്വേജ് സ്പീക്കേഴ്‌സ് അസോസിയേഷൻ, ബഹ്‌റൈൻ ഡ്രൈവിംഗ് ഇൻസ്ട്രക്ടേഴ്‌സ് അസോസിയേഷൻ, ബഹ്‌റൈൻ എൻവയോൺമെന്റൽ സർവീസ് അസോസിയേഷൻ, സ്റ്റുഡന്റ് സപ്പോർട്ട് അസോസിയേഷൻ, യംഗ് എന്റർപ്രണേഴ്‌സ് അസോസിയേഷൻ എന്നിവയും ഉത്തരവിലൂടെ റദ്ദാക്കപ്പെട്ടു.

കുവൈത്തി സ്റ്റുഡന്റ്സ് ക്ലബ് ഇൻ ബഹ്‌റൈൻ, ഈജിപ്ഷ്യൻ ക്ലബ്, കൊറിയൻ ക്ലബ്, ബഹ്‌റൈനി ലിവർപൂൾ ഫ്രണ്ട്സ് അസോസിയേഷൻ, ബഹ്‌റൈനി-ബംഗ്ലാദേശ് ഫ്രണ്ട്ഷിപ്പ് അസോസിയേഷൻ, ഓസ്‌ട്രേലിയൻസ് അസോസിയേഷൻ ഇൻ ബഹ്‌റൈൻ, ബഹ്‌റൈനി-ഫ്രഞ്ച് ബിസിനസ് ക്ലബ് തുടങ്ങിയ പ്രവാസി-സൗഹൃദ കൂട്ടായ്മകളും പിരിച്ചുവിട്ട പട്ടികയിലുണ്ട്.

തീരുമാനം പ്രാബല്യത്തിൽ വന്നതോടെ ഈ സംഘടനകളുടെ ഭാരവാഹികൾ, ഭരണസമിതി അംഗങ്ങൾ, ജീവനക്കാർ എന്നിവർ പ്രവർത്തനം തുടരുന്നതും ഫണ്ട് വിനിയോഗിക്കുന്നതും പൂർണ്ണമായി വിലക്കി. അസോസിയേഷനുകളുടെ എല്ലാ രേഖകളും റജിസ്റ്ററുകളും സാമൂഹിക വികസന മന്ത്രാലയത്തിന് കൈമാറാൻ ഭാരവാഹികൾക്ക് നിർദ്ദേശം നൽകിയിട്ടുണ്ട്. മന്ത്രാലയത്തിന്റെ രേഖാമൂലമുള്ള അനുമതിയില്ലാതെ ബാങ്ക് ഇടപാടുകളോ മറ്റ് സാമ്പത്തിക കാര്യങ്ങളോ നടത്താൻ പാടില്ല.

പിരിച്ചുവിട്ട സംഘടനകളുടെ ആസ്തികളും ഫണ്ടുകളും ലിക്വിഡേറ്റ് ചെയ്യുന്നതിനായി 'തലാൽ അബു-ഗസാല & കോ. ഇന്റർനാഷണൽ' എന്ന പ്രമുഖ സ്ഥാപനത്തെ ചുമതലപ്പെടുത്തി. ഉത്തരവ് വന്ന് 18 മാസത്തിനകം ലിക്വിഡേഷൻ നടപടികൾ പൂർത്തിയാക്കും. കടബാധ്യതകൾ തീർത്ത ശേഷം ബാക്കിവരുന്ന മുഴുവൻ തുകയും നിയമപ്രകാരം 'സിവിൽ സോഷ്യൽ വർക്ക് ഫണ്ടിലേക്ക്' മാറ്റുമെന്നും മന്ത്രാലയം അറിയിച്ചു.