ഇസ്രായേൽ മ്യൂസിക് ഫെസ്റ്റിവലിന് തിരിച്ചടി; ഗസ്സ വംശഹത്യയിൽ പ്രതിഷേധിച്ച് വിദേശ അതിഥികൾ കൂട്ടത്തോടെ വിട്ടുനിൽക്കുന്നു

ഷീബ വിജയൻ

തെൽ അവീവ്: ഇസ്രായേലിലെ പ്രമുഖ സംഗീതോത്സവമായ 'ഇസ്രായേൽ മ്യൂസിക് ഷോക്കേസ് ഫെസ്റ്റിവലിൽ' നിന്ന് അന്താരാഷ്ട്ര സംഗീത പ്രമുഖർ കൂട്ടത്തോടെ വിട്ടുനിൽക്കുന്നു. വർധിച്ചുവരുന്ന സാംസ്കാരിക ബഹിഷ്കരണത്തിന്റെയും ഇസ്രായേൽ വിരുദ്ധ വികാരങ്ങളുടെയും പശ്ചാത്തലത്തിലാണ് വിദേശ അതിഥികളുടെ ഈ പിന്മാറ്റം. ഇസ്രായേലി കലാകാരന്മാരെ അന്താരാഷ്ട്ര തലത്തിൽ അവതരിപ്പിക്കാൻ ജെറുസലേമിലും തെൽ അവീവിലുമായി നടത്തുന്ന പതിനേഴാമത് മേളയാണിത്. മേളയുടെ ഡയറക്ടർ അട്ച ബാർ വ്യക്തമാക്കിയതനുസരിച്ച്, കഴിഞ്ഞ വർഷം 60 വിദേശ അതിഥികൾ പങ്കെടുത്ത സ്ഥാനത്ത് ഇത്തവണ പകുതി പേർ മാത്രമാണ് എത്തുന്നത്.

മാർക്ക് എലിയാഹു, യായേൽ ഡെക്കെൽബോം, ഷലോഷ് തുടങ്ങിയ പ്രമുഖ ഇസ്രായേലി സംഗീതജ്ഞർ പങ്കെടുക്കാനിരിക്കെയാണ് ഈ തിരിച്ചടി. വിദേശ പ്രൊഫഷണലുകൾ ഇസ്രായേലിലേക്കുള്ള യാത്രകൾ പൂർണമായി ഒഴിവാക്കുകയാണെന്ന് ആർട്ടിസ്റ്റിക് ഡയറക്ടർ ഹദാസ് വനുനു പറഞ്ഞു. കൂടാതെ സാമ്പത്തിക പ്രതിസന്ധിയും സാംസ്കാരിക ഫണ്ടുകളിലെ വെട്ടിക്കുറയ്ക്കലും മേളയെ ബാധിച്ചിട്ടുണ്ട്. യൂറോപ്യൻ രാജ്യങ്ങളിൽ നിന്നുള്ള താൽപ്പര്യം കുറഞ്ഞതോടെ സംഘാടകർ വടക്കേ അമേരിക്ക, ഏഷ്യൻ രാജ്യങ്ങളിലേക്ക് ശ്രദ്ധ തിരിക്കുകയാണ്.

ഗസ്സ വംശഹത്യ, ഇറാൻ യുദ്ധം, മാനവിക പ്രതിസന്ധികൾ എന്നിവയുടെ പശ്ചാത്തലത്തിൽ ബിഡിഎസ് പ്രസ്ഥാനത്തിന്റെ നേതൃത്വത്തിൽ നടക്കുന്ന സാംസ്കാരിക ബഹിഷ്കരണത്തിന്റെ ഭാഗമായാണ് ഇത്. കലയെ രാഷ്ട്രീയ ആവശ്യങ്ങൾക്ക് ഉപയോഗിക്കുന്നു എന്നാരോപിച്ചാണ് വിദേശ കലാകാരന്മാർ വിട്ടുനിൽക്കുന്നത്. എന്നാൽ, തങ്ങൾ ഇസ്രായേൽ സർക്കാരിനെയല്ല മറിച്ച് സംഗീതത്തെയാണ് പ്രതിനിധീകരിക്കുന്നതെന്ന് ഷലോഷ് ബാൻഡിലെ ഗാടി സ്റ്റേൺ അഭിപ്രായപ്പെട്ടു. രാഷ്ട്രീയവും കലയും തമ്മിലുള്ള അതിരുകൾ മായുന്ന ഈ സാഹചര്യത്തിൽ, ഇസ്രായേലി കലാകാരന്മാർക്ക് അന്താരാഷ്ട്ര വിപണിയിൽ പ്രവേശനം ലഭിക്കുന്നത് കൂടുതൽ സങ്കീർണ്ണമായി മാറുകയാണ്.