സഹോദരിമാരുടെ ഭര്ത്താക്കന്മാര് തമ്മില് പ്രണയം..ഒടുവിൽ വിവാഹം
അഹമ്മദബാദ്: സ്വവര്ഗ്ഗ പ്രണയികളുടെ വാര്ത്തകളില് പുതുമയില്ല. പക്ഷേ, സഹോദരിമാരുടെ ഭര്ത്താക്കന്മാര് തമ്മില് പ്രണയിച്ചാല് എന്തുണ്ടാകും? ഗുജറാത്തിലെ അഹമ്മദബാദില് നിന്നാണ് ഈ സംഭവം.
തങ്ങളെ ഉപേക്ഷിച്ച് ഭര്ത്താക്കന്മാര് ഒന്നിച്ചു ജീവിക്കാന് തീരുമാനിച്ചെന്ന് കാണിച്ച് രണ്ട് യുവതികള് പ്രാദേശിക കോടതിയില് കേസ് ഫയല് ചെയ്തു. ജീവനാംശം നല്കണമെന്നാണ് രണ്ടുപേരുടെയും ആവശ്യം. ഇതിന് പുറമെ മൂത്ത സഹോദരിയെ മുത്തലാഖിലൂടെയാണ് ഭര്ത്താവ് ഉപേക്ഷിച്ചതെന്നും പരാതിയില് പറയുന്നു.
കോടതിയില് സമര്പ്പിച്ച പരാതി അനുസരിച്ച് 2010ലാണ് മൂത്ത സഹോദരിയുടെ വിവാഹം നടന്നത്. അധികം വൈകാതെ ഇവര്ക്ക് ഒരു കുഞ്ഞും പിറന്നു. 2013ല് ഇളയ സഹോദരിയുടെ വിവാഹം നടന്നു. ഇതിനുശേഷമാണ് രണ്ടു പേരുടെയും ഭര്ത്താക്കന്മാര് തമ്മിലുള്ള പ്രണയ ബന്ധം തുടങ്ങിയത്. ഒന്നരവര്ഷത്തിനുള്ളില് ഇരുവരും ഭാര്യമാരെ ഉപേക്ഷിക്കുകയും ചെയ്തു.
പരാതിയുമായി പോലീസ് സ്റ്റേഷനില് എത്തിയെങ്കിലും കുടുംബത്തെ നോക്കുന്നില്ല എന്നതിനപ്പുറം ഒരു കേസും ചാര്ജ് ചെയ്യാന് വകുപ്പില്ലായിരുന്നു. ഇതേത്തുടര്ന്നാണ് ഗാര്ഹിക പീഡനത്തില് നിന്നുള്ള സംരംക്ഷണം ആവശ്യപ്പെട്ട് മജിസ്ട്രേറ്റ് കോടതിയില് യുവതികളെത്തിയത്.
