ജ്വല്ലറി അറേബ്യയിൽ ഇന്ത്യൻ തിളക്കം
പ്രദീപ് പുറവങ്കര
സാഖീർ : മിഡിൽ ഈസ്റ്റിലെ ആഭരണങ്ങളുടെയും വാച്ചുകളുടെയും ആഡംബര ബ്രാൻഡുകളുടെ ഏറ്റവും വലിയ പ്രദർശനമായ 'ജ്വല്ലറി അറേബ്യയുടെ' 33-ാമത് പതിപ്പിൽ ഈ വർഷവും ഇന്ത്യയുടെ പങ്കാളിത്തം ശ്രദ്ധേയമായി. സാഖീറിലെ എക്‌സിബിഷൻ വേൾഡ് ബഹ്‌റൈനിൽ നടക്കുന്ന മേളയിൽ, 972 ചതുരശ്ര മീറ്റർ വിസ്തൃതിയിൽ ഒരുക്കിയ ഇന്ത്യാ പവലിയൻ ഈ വർഷത്തെ പ്രദർശനത്തിലെ ഏറ്റവും വലുതാണ്.
ബഹ്‌റൈൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയാണ് ഈ ആഡംബര മേള ഉദ്ഘാടനം ചെയ്തത്. ലോകമെമ്പാടുമുള്ള 700-ലധികം ആഭരണ നിർമ്മാതാക്കൾ പങ്കെടുത്ത ഈ പ്രദർശനത്തിൽ, 57 ഇന്ത്യൻ ആഭരണ പ്രദർശകരെയാണ് ഇന്ത്യാ പവലിയനിൽ അണിനിരത്തിയിട്ടുള്ളത്. ഇന്ത്യൻ ഡിസൈനുകളുടെ വൈവിധ്യവും കരകൗശലമികവും മേളയിലെത്തിയവരുടെ ശ്രദ്ധയാകർഷിച്ചു. മേളയുടെ പ്രാധാന്യം കണക്കിലെടുത്ത്, ഇന്ത്യൻ അംബാസഡർ വിനോദ് കെ. ജേക്കബ് കഴിഞ്ഞ ദിവസം പ്രദർശന വേദിയും ഇന്ത്യാ പവലിയനും സന്ദർശിച്ചു. അദ്ദേഹം ഇന്ത്യൻ ആഭരണ പ്രദർശകരുമായി ആശയവിനിമയം നടത്തുകയും അവരുടെ പങ്കാളിത്തത്തെ അഭിനന്ദിക്കുകയും ചെയ്തു.
മേഖലയിലെ ഏറ്റവും വലിയ ആഡംബര ഷോപ്പിംഗ് ഇവന്റ് എന്ന നിലയിൽ വിജയകരമായി പുരോഗമിക്കുന്ന ജ്വല്ലറി അറേബ്യയുടെ ഭാഗമായി, മൂന്നാം 'സെന്റ് അറേബ്യ' എഡിഷനും സംഘടിപ്പിച്ചിട്ടുണ്ട്.
്ി്േി
