കുവൈറ്റിൽ വിദേശികൾക്ക് ഡ്രൈവിംഗ് ലൈസൻസ് നൽകുന്നത് നിർത്തിവച്ചു
കുവൈറ്റ് സിറ്റി: കുവൈറ്റിൽ വിദേശികൾക്ക് ഡ്രൈവിംഗ് ലൈസൻസ് നൽകുന്നത് താത്കാലികമായി നിർത്തിവച്ചു. ഇനിയൊരു അറിയിപ്പുണ്ടാകുന്നതുവരെ ലൈസൻസ് വിതരണം നിർത്താൻ ആഭ്യന്തരമന്ത്രാലയം അണ്ടർ സെക്രട്ടറി ലഫ്. ജനറൽ ഫൈസൽ അൽ നവാഫ് ആണ് ഉത്തരവിട്ടത്. നിലവിൽ ഏഴ് ലക്ഷത്തിലധികം വിദേശികൾക്ക് കുവൈറ്റ് ഡ്രൈവിംഗ് ലൈസൻസുണ്ട്. ഇതിൽ രണ്ടര ലക്ഷത്തോളം പേർ ലൈ സൻസിനുള്ള നിശ്ചിത അർഹത മാനദണ്ഡങ്ങൾ പുലർത്തുന്നില്ല എന്ന വിലയിരുത്തലിന്‍റെ അടിസ്ഥാനത്തിൽ സമഗ്ര പരിശോധനക്ക് മുന്നോടിയായാണ് ലൈസൻസ് നടപടികൾ നിർത്തിവെച്ചത്.
സമഗ്ര പരിശോധന ഈമാസം തന്നെ ആരംഭിക്കും. എല്ലാ ലൈസൻസുകളും പരിശോധിച്ച് അർഹതയുള്ളവരുടേത് മാത്രം നില നിർത്താൻ നടപടിക്രമങ്ങൾക്ക് മൂന്നുമാസം വേണ്ടിവരുമെന്നാണ് വിലയിരുത്തൽ.
